Silap pissusianut suliniummi USA tapiissuteqarpoq

Danmarks MIljøundersøgelser USA-mit 2 millioner koruuninik tunineqarpoq, ilaatigut Kalaallit Nunaanni upernajaarnerusalerneranut tuttut umimmaallu naleqqussarsinnaanerisa qulaarnissaanut atugassanik.

Ukiut ingerlaneranni tuttut piaraasa amerlassusaat ikileriarsimapput, tamatumunngalu pissutaasinnaavoq Kalaallit Nunaanni siusinnerusukkut upernartalernera Ass.: Sermitsiaq

- Kalaallit Nunaanni siusinnerusukkut upernartaleraluttuinnarneranut naasoq qanoq sukkatigisumik qanorlu annertutigisumik qisuariarsinnaappat?

- Aammalu tuttut umimmaallu uumassuseqarnertik upernaamut siusinnerusumut naleqqussarsinnaavaat?

- Uumasunut naasortortunut nerisaannullu silap pissusiani pissutsit suut pingaarnersappat, tamakkulu Kalaallit Nunaanni tamarmi assigiinngissuteqarpat?

Tassa apeqqutit professor Mads C. Forchhammerip aamma adjungeret professorip Eric Postip, Danmarks Miljøundersøgelserimeersut (DMU), Aarhus Universitetmimi, amerikarmut ikiortigalugit pitsaanerusumik paasisaqarfiginiagassaat.

Taamatut allappoq dmu.dk.

National Science Foundationip, (NSF), USA-p ilisimatusarnermuit aningaasaateqarfiata, Forchhammerimut Postimullu 2 milioner koruunit aningaasaliissutigai, taakkua misissorniarmassuk ukiuni qulikkaani kingullerni naasut siusinnerusukkut naasalernerat pissutigalugu uumassuseqarnermi allannguutit annertuut, ilaatigullu misissorniarlugu allannguutit tamakkua issittumi avannarpasinnerusumi kujasinnerusumilu silap pissusiata allanngorneranik assigiissumik kinguneqarnersut.

- Silap pissusiata allanngoriartornera Issittumi assersuutigalugu kiassusia aputeqassusialu sukkasoorujussuarmik allanngortissinnaavai, ineriartornrlu tamanna arajutsisaanneqartorujussuuvoq, Mads C. Forchhammer oqarpoq. Taassuma tikkuarpaa uumasoqarnikkut allannguuitit tamakkua uppernarsaataat paasineqarsimasut annikinnerusumik samminiarneqartarsimasut, Zackenborgimi Kangerlussuarmilu stationeqarfiit pilersinneqarnerisa siornatigut.

Misissuinerit nutaat takutippaat uumassuseqarnera annertuumik allanngorsinnaasoq, tassa organismit tamarmik silap pissusianut assigiissumik qisuariarneq ajormata. Assersuutigalugu Kangerlussuup eqqaani tuttut piaraat ikileriarsimapput, qularnanngitsumik pissutigalugu uumasut tamakkua nerisaat siusinnerusukkut naasalersimammata. Siusinnerusukkut naasut naasalenerannut tuttut piaqqinissaminnut malinnaasinnaanngillat.

Powered by Labrador CMS