Sungiusarneq: Toqusut pingasut - amerlasuut annaanneqarput
Umiarsuit, timmisartoq aamma Pituffik ataatsimut annaassiniarnermik sungiusarput.
Annaassiniarnermut sungiusarneq taaguutilik »Northern Deployment« immami Pituffiup avatinnguani pisut naapertorlugit ajunngitsumik naammassineqarpoq.
TAKUUK WEB-TV: Ajunaarnersuarmik sungiusarneq
Ilaasut pingasut »ajunaarput« takornarianik angallassisartoq umiarsuaanni »Rigor Mortis«imi ikuallarujussuartoqarneratigut, kisianni alapernaarsuummit »Hvidbjørnen«imit ilaasut 57-it annaanneqarput, taakkunannga 15-it aqqunartitersimasut.
Issittup imartaani piviusumik umiusoqartoqassagaluarpat inuppassuit suli amerlanerusut inuunerannik aqqunarnerannillu tamanna akeqarsimassagaluarpoq.
Alapernaarsuut »Ejnar Mikkelsen« ullumi tassani umiarsuaq takornariartaatiusaartinneqarpoq »Rigor Mortis«itut ikuallattoq »Hvidbjørnen«imit ikioriartorneqartoq. Timmisartoq Challenger piaarnerpaamik orniguppoq umiarsuup ajunaarnermik eqqorneqartup qanoq innera paasiniarlugu, immami tassani anorip silallu qanoq innera aamma paasiniarlugit.
»Hvidbjørnen«-ip gummibådii marluk umiarsuit taakku marluk akornanni uteqattaarput ajoqusersimasunik ingerlaannaq alapernaarsuummi umiarsuarmi passunneqartunik ilaasoqarlutik.
Ajoqusernerpaat Pituffimmi helikopterimik Lynx-imik timmisartuunneqarput, ajoqusersimasut pitsaanerulersulli ajoqusersimanngitsullu Pituffimmut angallammik ingerlanneqarput, tassani talittarfimmi ambulancit utaqqillutik.
sermitsiaq.gl-ip »Hvidbjørnen«-imut ilaalluni sungiusarneq malinnaaffigaa.
Alapernaarsuummi tassani inuttaasut sungiusarneq, Nunatsinni siullerpaasoq, pikkoreqalutik naammassivaat. Umiartortut umiarsuarmi suli arlalinnik suliassaqarput. Ajutoornermi mekanikerit, elektrikerit aamma igasut allanik suliaqalersarput, ikuallannermi anersaartuuserlutik pujormiittartunngortarput, eqqiaasunngortarput annaassiniartartunngortarlutillu. Aquttarfimminngaanniit maskiinaqarfimmut inuttat tamarmik ajutoornermi suliassatik naluneq ajorpaat soorlu umiarsuup takornariartaatip ajutoornerani.
ALLAASERISAQ ATUARUK: Sungiusarneq: Umiarsuaq takornariartaat ikuallappoq
»Hvidbjørnen«-imi inuttat 43-pput, kisianni uani angalanermi aamma sakkutuut 16-it ilaasorineqarput, taakkulu sungiusarnermi iluaqutaaqaat. .
2008-mi umiarsuit takornariartaatit 41-it 28.891-inik ilaasoqartut Nunatsinniipput.