Natteravnit Savalimmiuni iluatsitsipput
Tórshavnimi natteravnit 40-pput marloriaammilli amerlanerunissartik sulissutigaat. Iluatsitsilluarnermut pissutaasut ilagaat Københavnimi Natteravnit allaffeqarfiat suleqatigigamikku.
- Danmarkimik suleqateqarnerput uagutsinnut pingaaruteqartorujussuuvoq, ilisimasanik tuniorartinnerup saniatigut Danmarkimiit pikkorissaajartortoqartarpoq. Isumaqatigiissitsiniarnermik ilinniartitsisinnaasoq pikkorissarfiginikuuarput, Daisy Sloan Natteravnit Tórshavnimi siulittaasuat oqarpoq.
Kalaallit Nunaanni Natteravnit ikiorneqarlutillu siunnersorneqassapput. Københavnimi Natteravnsekretariatimi pisortaq Erik Thorsted oqarpoq, Nunat avannarliit piorsarsimassutsikkut aningaasaateqarfiannut qinnuteqartoqarpoq Kalaallit Nunaanni Natteravnit ikiorserneqarnissaat anguniarlugu.
- Tamanna isumaqarpoq uagutsinninngaanniit Kalaallit Nunaannukartoqassamaartoq, Erik Thorsted oqarpoq.
Taassuma nuannaarutigaa Nuummi Natteravnit Nanu Børnillu suleqatigiilersimanerat. Tikkuarluguli Savalimmiuni suliniutit ilinniarfiusinnaasut.
- Kalaallit Nunaanni inunnik sullissiniartut tapersersorneqartarnerat allaavoq. Aallartikkaluartut uniinnartarput, Erik Thorsted oqarpoq.
Kiisalu erseqqissaatigaa Kalaallit Nunaat ataatsimeersuarnerni peqataasaannginnera naak nunat avannarliit allat tamarmik peqataatitaqartaraluit. Tamatumani aningaasaqarnerup aporfiusarnera nassuerutigaa
Sapaatip akunnerani 37-mi Sermitsiaq Nuummi natteravnit pillugit allaatigisaqassaaq.