Peqqissaarlutit umiatsiassannik qinaasigit
Angallateeqqat qajannartut inuit inuunerinik naleqarsinnaapput. Umiatsiaanik nioqqutilik internettikkut umiatsiarsiniarnissamut mianersoqqusivoq, pisiarisaq qanoq ittuunersoq ilisimaneqartanngimmat,.
Umiatsiaat Kalaallit Nunaanni pissutsinut naleqqutinngitsut inuit inuunerinik akeqartareernikuupput. Inuit inuunerisa ulorianartorsiortinneqartarnerat Qanoruumi nutaarsiassatigut arlalinnit eqqaaneqartareerpoq.
Umiatsiaanik Bella-nik Yamatek A/S kisermaassisuulluni nioqquteqartuuvoq. Tassanngalu piginneqataasup Christian Fleischerip Qanoruumut oqaluttuaraa, Kalaallit Nunaanni umiatsiaanik nioqqutilik umiatsiaanik Bellanik immikkut mattusagaanngitsunik Danmarkimi tamakkuerniartartumiit pisisimasoq, Yamatek-ili umiatsiaanik Bella-nik Kalaallit Nunaannut tikisitsissagaangami tamatigut taamaaliortarnerarlugu.
– Umiatsiaat assigiinngitsorujussuarmik Kalaallit Nunaanni Skandinaviamilu atorneqartarput, Christian Fleischer oqarpoq.
– Usgut usinerujussuusarlutalu ilaasoqarnerugajuttarpugut. Ungasiliarajunnerusarattalu aamma orsussamaagteqarnerusarluta. Taamaalilluni umiatsiaq pingaartumik motorip tungaatigut oqimaannerujussuanngortarpoq, Christian Fleischer oqarpoq.
Umiatsiaanik nioqqutillit ullut tamaasa inunnik umiatsiamik qanoq ittumik pisssanerlutik eqqarsatunik naapitsisarput. Amerlasuut aningaasanik sipaarumallutik internettikkut nunanit allaniit umiatsiarsiniartarput.
– Taakkuli naatsorsuutigissavaat umiatsiaanik Kalaallit Nunaanni pissutsinut naleqqussagaanngitsunik pisissagamik, Christian Fleischer mianersoqqusivoq.