KNR: Uagut pisuunngilagut

KNR-ip pisuutitsineq ilumuunnginnerararpaa, illoqarfinni tusagassiorfiit nuna tamakkerlugu tv- aamma radioqarfik pisuutippaat ilanngutassianik pisisarunnaanermikkut, taassuma susinnaajunnaartikkaatsik.

TV-qarfinnit isornartorsiuineq KNR-imit ilumuunnginnerarneqarpoq. Assiliisoq: Leiff Josefsen

KNR-ip illoqarfinni tv-qarfinnit ilanngutassianik pisisarunnaarneranut atatillugu, illoqarfinni tv-qarfiit sipaarniarnerat KNR-imit akisussaaffigineqarnianngilaq.

ATUARUK ALLAASERISAQ: Illoqarfinnit nutaarsiassat KNR-ip unitsippai

KNR-ip maannakkut 720.000 koruunit sinerissamiit nutaarsiassanut pisisarnissamut atugassatut immikkoortinneqarsimasut atoreerpai. Taamaattumik nuna tamakkerlugu tusagassiorfiup, atuivallaarnissaq pinngitsoortinniarlugu illoqarfinni tusagassiorfinnit nutaarsiassanik pisisarnini unitsippaa. Tamatuma kingunerisinnaavaa Sisimiut TV-mi sulisunik soraarsitsisoqartariaqarnera, Sisimiut TV-mi siulersuisut Sermitsiamut oqarput.

– Kisianni taamatut oqarluni, Sisimiuni aallakaatitassiortartut immaqa sulisuminnik soraarsitsisariaqarnerminnut KNR pisuutissallugu, uanga tamanna akuerinngilara, KNR-ip pisortaa Ivalo Egede tusagassiutitigut nalunaaruteqarluni oqarpoq.

– Tassami KNR-ip illoqarfinni nutaarsiassaqarfinnit pisinissaminut atugassani tamangajaasa Sisimiunut atorsimavai, tassa 2009-mi uagut Sisimiuni TV-liortartartunit pingasuusunit 700.000 koruunit atorlugit pisivugut. Ilanngutassiat amerlanersaat Sisimiut TV-mit aamma Sarsua Mediamit pisiaralutigit. Sisimiut TV-mi aningaasarliorneq sivisuumik tusatsiarneqartarsimavoq. Kisianni tamatumunnga KNR akulerunneqartussaanngilaq, Ivalo Egede oqarpoq.

ATUARUK ALLAASERISAQ: TV-qarfimmi siulersuisut tatigineqanngillat

Powered by Labrador CMS