TV-qarfimmi siulersuisut tatigineqanngillat
Sisimiut TV-mi ilaasortat 200-ngajaat ilaat sakkortuumik apeqquteqartarput akiligassaqalersimanerlu akerleralugu ataasimiiffimmiit aniinnaarlutik. Utaqqiisaagallartumik siulersuisunngortut aqagu ataatsimiissapput.
Siulersuisut suna tamaat saqqummiuppaat ilaasortallu tamatumunnga akissuteqarlutik tatiginninnginnertik nalunaarutigaat. Ilaasortat 200-ngajaat sisamanngormat unnukkut immikkut ittumik ataatsimeersuariartut, Sisimiut TV-ata naatsorsuutaanut aningaasartuutinut uppernarsaatitaqarnatik tukattunut, mamiatsassimanertik, kamannertik aamma susinnaanatik misigisimanertik isertuutinngilluinnarpaat, tassami siulersuisut ukiuni arlalinni aningaasaqarneq aqussimanngilaat.
ATUARUK ALLAASERISAQ: Sisimiut TV-eqarfiani paatsiveerunneq
Naak pisortaasimasumut arlalippassuariarlutik naatsorsuutit sumut killinneraq aamma qanoq innerat pillugu, siulersuisut qanoq ittoqarpiarnera pilugu paasitinneqartarsimanngillat, siulittaasuugallartoq Peter Lennert nassuiaavoq. Siulersuisut ukapaasiarineqarsimasutut misigisimapput kiisalu ajuusaarutigalugu, siusinnerujussuakkut susoqarpiarsimanersoq takusinnaasimannginnamikku. Kisianni nassuiaat tamanna ilaasortanit iluarineqanngilluinnarpoq.
Siulersuisut assatik asappaat akisussaaffillu qimarratigalugu, oqartoqarpoq, kiisalu tupigusunnermik paatsiveeruttoqarpoq paasinarsimmat ullormut oqaluuserisassani pingaarnerpaaq, tassaasoq siulersuisunik qinersineq ingerlanneqarsinnaanngitsoq. Ilaasortat aatsaat siulersuisunik nutaanik qinersisinnaapput, naatsorsuutit kukkunersioriikkat saqqummiunneqareerpata ataatsimeersuartunillu akuersissutineqareerpata. Naatsorsuutillu suli naammassineqarsimanngimmata, tassa amigaateqarlutik suli kukkunersiuisumiimmata, taava ilaasortat isumaqatigiissutigaat utaqqiisaagallartumik suleqatigiissitaliornissaq, taakku siulersuisut qulaajaaneranni ikiuutissapput.
– Aap, tamanna soorunami uagut tatiginninnginnertut isigaarput, kisianni tamatumunnga ilutigitillugu oqiliallaatigaarput piviusut saqqummiukkatsigit. Uagut akisussaaffipput qimarratiginngilarput, aningaaserisoq Hans Ole Jensen ataatsimiinnerup kingorna oqarpoq.
Ullummikkut suleqatigiissitaagallartup qallunaaq kukkunersiuisoq, maannakkut illoqarfimmiittoq naapissavaat. Pilersaarutaavoq maannakkut pilertortumik sulinasuartoqarnissaa. Ataatsimiititaliap Canal Digitalimut aamma TELE-mut qanoq akiliisoqarsinnaanera paasiniassavaat kiisalu misissussallugu aningaasanik katillugit akiitsunut 1,9 millioni koruuninik atorniarsinnaaneq, naafferarlugillu akilersuisoqarsinnaanersoq. Naatsorsuutillu kukkunersiorlugit naammassineqareeriarpata, ataatsimeersuarnissamut aggersaasoqassaaq taamanikkornissaanullu siulersuisunik nutaanik qinersisoqassalluni.