Siorapalunni marlunnik kaffisortitsisoqarpoq
»Ejnar Mikkelsen« Kalaallit Nunaanni nunaqarfik avannarpasinnerpaaq tikippaa.
Siorapalunni ullumi marloriarluni kaffisortitsisoqarpoq.
Sapaammi ullaakkut alapernaarsuut »Ejnar Mikkelsen« Kalaallit Nunaata, ilami Nunarsuarmi nunaqarfiit avannarpasinnersaat Siorapaluk tikippaa umiartortullu nunaqarfiup innuttai umiarsuarmut nutaamut kaffisoriartoqquaat.
Tamatuma saniatigut ullumikkut Kangdi Oshima marlunnik ukioqalermat angajoqqaavilu Susanne aamma Maassannguaq Oshimakkut illuminni nammineq sanaaminni isikkivigeqisumi aamma kaffisortitsillutik.
Kangdi Oshima japanimiup Ikuo Oshimap ernutaraa. Kangdi japanimiusut isumaqarpoq »qungujunneq«. Ikuo Oshima 62-nik ukiulik ukiut 36-t matuma siorna Avanersuarmut pivoq ullumilu tallimanik meeraqarpoq arfineq-marlunnillu ernutaqarluni.
Siorapalummi innuttaasut amerlanersaat umiarsuarmik takornarniarput nerisarfinnilu sutugassinneqarlutik.
– Umiarsualivissigaangatta akuttunngitsunik kaffisoriartoqquneqartarpugut inoroornerlu taanna akiniarlugu kaffisortitsivugut, »Ejnar Mikkelsenip« naalagaa Ole Nielsen sermitsiaq. gl-imut oqarpoq.