KNR: Ivianginut utoqqatserpugut
Danmarkip Portugalillu VM-imut anngunniullutik unamminerat KNR-TV-kut aallakaatinneqartoq ilimaginngisamik naggaserneqarpoq iviangit tv-kut takutinneqarmata. KNR-p iviangiinnarnik takutitsineq ajuusaarutigaa.
Danmarkip Portugalillu KNR-TV-kut aallakaatinneqartumik VM-imut anngunniullutik unamminerat ilimaginngisamik naggaserneqarpoq, tv-kut isiginnaartut unamminerup naggataanik pissanganaqisumik isiginnaarneranni iviangiinnaat saqqummersinneqarmata.
Danmarkip Portugalillu unamminerisa naggataani portugalimiut saassusseqattaaleruttortut aallakaatitsineq taarserneqariataarpoq tv-kut iviangiinnarnik saqqummersunik, sekundinik arlalinnik sivisussusilimmik.
KNR-imi sarfaaruttoortoqarsimavoq tamannalu atortunik digitaliusunik ajornartorsiortitsivoq, knr.gl nassuiaavoq.
– Unamminerup ingerlanerani sulisup atortuni Danmarkimit assinik tigooraasarfimmeersunit toortagaq toortoorpaa. Sekundini Danmarkimit assinik toqqaannartumik takutitatsinni DR2 Tema Lørdag-ip aallakaatitassiaq "Nøgne Bekendelser" takutippaa. Sekundialunni taakkunani arnap sakiaa tamataqanngitsoq KNR-TV-kut takutinneqarpoq. Iluatsitsinerliorpugut, ajutoornerli pivoq KNR-illu tamanna ajuusaarutigaa, knr.gl allappoq.
Sekundinili taakkunani isertitsisoqanngilaq, nunatsinnilu tv-kut isiginnaartut dommerip naggataamik siggarnera takuvaat, tv-kut assit arsaattunut utertinneqarmata.
Unammineq 1-1-imik inerneqarpoq Danmarkilu gruppi 1-imi suli siuttuuvoq, malinnaasumit qaninnerpaamit Ungarnimit pointinik sisamanik siarsimanerulluni.