Kangilinnguani Sakkutooqarfik: – Issittumi sakkutuulersuinngilagut

– Issittumi sakkutuulersuinerunngilagut. Uagut issittumi suleqatigiippugut, Kangilinnguani Sakkutooqarfiup naalagaa, sakkutut naalagaat kontreadmiral Henrik B. Kudsk sermitsiaq.gl-imut oqarpoq.

Taamaalillunilu Forsvarets Efterretningstjenestep ernummateqarneranut nalorninartoqarsinnaanera pillugu nalunaarusiami, »Efterretningsmæssig risikovurdering 2009« (Sakkutuut isertortumik paasiniaasartut 2009-mi nalorninartoqarsinnaaneranik naliliinerat, nuts.) saqqummiunneqartoq isumaqatiginngilaa.

– Naalagaaffiit issittup sineriaaniittut annikitsumik aporaassinnaanerat aamma aallartitaqarnikkut isumaqatigiinngissinnaanerat nalornissutinut ilaavoq, tamatumunnga pissutaavoq tamaani inissisimaneq aamma minnerunngitsumik nukissiornermut tunngatillugu politikkikkut soqutigisat aporaannerat, Forsvarets Efterretningstjeneste allagaqarpoq.

Henrik B. Kudsk sermitsiaq.gl-imut oqarpoq Kangilinnguani Sakkutooqarfimmit avannarpasinnerusoq ukiuni makkunani qitiutinneqartoq.

– Silaannaap allanngoriartornerata kingunerisaanik Issittumi imaatigut angalaneq annertusivoq: Umiarsuit takornariartaatit nutaanik angallavissarsiorput, umiarsuit niuffagiutit aqqut qaninneq ujartorpaat aamma ingerlatsiviit uuliasiortut ukiut arlaqanngitsut qaangiuppata Baffinip Kangerliumarngani uuliasiorlutik aallartissapput.

– Kangilinnguani Sakkutooqarfik avannaani najuuttariaqarpoq pivisusoq nutaaq malinnaaffiginiarlugu, Henrik B. Kudsk oqarpoq.

Taamaattumik sakkutut alapernaarsuutaat »Hvidbjørnen« aamma sinerissami alapernaarsuutit nutaat marluk »Knud Rasmussen« aamma »Ejnar Mikkelsen« Kalaallit Nunaata Kitaata Avannaani aamma Kangiani Avannaani takussaapput, tassami maannakkut umiarsuit takornarianik angallassisartut angalaleruttormata.

Kiisalu tamanna issittumi sakkutuulersuinerunermik tunngaveqanngilaq:

– Pinngortitaruna unammilligassaasoq Qalasersuup qanittuani eqqaamiugut pinnatik, Henrik B. Kudsk oqarpoq.

Sermitsiaq normu 37-mi sinnera atuaruk...