Piorsaavik nittartagaqalerniarpoq
Nuummi sullivik Piorsaavik nittartagaqalerniarluni pilersaaruteqarpoq, taanna aqqutigalugu inuit pequtinik pisoqqanik aamma nutaanik pisisinnaalersillugit.
Piorsaaviup annertunerusumik ilisimaneqarnissaani pisariaqartippaa, taamaatumillu nammineq nittartagaqalernissani pilersaarutigalugu, taanna aqqutigalugu sulliviup nammineq sanaavinik aamma pequtinik atornikunik assitalersukkanik innuttaasut takunnissinnaassamata, kiisalu nittartagaq aqqutigalugu pisiniarsinnaassallutik, sermersooq.gl allaaserisaqarpoq.
Sullivimmi pequsiat aamma pequtit atornikut innuttaasut akornanni suli ilisimaneqarpallaanngillat, taamaattumillu nammineq nittartagaqalernissamut periarfissat maannakkut misissorneqarput.
Minnerunngitsumik sulisut sullivimmi periarfissat suunerat annertunerusumik nittarsaanniarpaat. Tassami sullivimmi pisiarineqarsinnaasut tassaaginnanngillat sanaat nalinginnaasut aamma pequtit atornikut. Inuit aamma namminneq suliaritikkusutaminnik immikkut inniminniillutik suliarititsisinnaapput. Soorlu assersuutigalugu pequtit iluarsaatsinneqarsinnaapput, uuttortaareersimaneq tunngavigalugu ilisiviliortitsisoqarsinnaavoq, puuguttanut ilioqqaaviliortitsisoqarsinnaavoq il.il..
Sullivimmili pequtit qanganitsat pissarsiarineqarsimasut katersorneqarallarniarput kingusinnerusukkut akitsortiterinikkut tuniniarniarlugit.
- Naak sinneqartoornissarput anguniartussaanngikkaluarlutigu taammattoq uagut soqutigaarput aningaasanik isertitsinerulaarnissarput, taamaaliornikkut inuusuttut qaqugugaluarnersoq paasisassarsiorlutik angalasinnaaniassammata, Nina Esrassen sannavimmi atornikunik suliassanillu sammisassaqartitsinermi immikkoortoqarfimmi pisortaq oqarpoq.
Innuttaasunillu qularutigineqassanngilaq aningaasat akiliutigiumaakkamik atorluarneqarnissaat, taakkumi 30 procentiat Sanningasoq Aappalaartumut nakkartarput sinnerilu meeqqanut inuusuttunullu suliniutinut atorneqartarlutik.