Meeqqat Inuunerissut: Meeqqat illuat pisariaqarunnanngilaq
Kalaallit Nunaanni meeqqanik inuusuttunillu kinguaassiutitigut atornerlunneqarsimasunut katsorsaavissamik illuliortoqassagunanngilaq, taamatut inerniliivoq peqatigiiffik meeqqat inuunerissut, ulluni marlunni Katuami isumasioqatigiittoqareernerani.
Kisianni maannakkut periarfissat pioreersut atorluarneqarnerusariaqarput, Meeqqat Inuunerissut siulittaasuat Line Frederiksen Radioaviisimut oqarpoq, kisianni aalajangiusimavaa meeqqat kinguaassitimikkut atornerlunneqarsimasut katsorsarneqarnissamik pisariaqartitaminnik amerlasuut atugassaqartinneqartanngitsut.
- Tamatta isumaqatigiippugut annertunerusumik iliuuseqartariaqarluta. Ullumikkornit pitsaanerusumik iliuuseqatariaqarpugut. Kisianni tamatumunnga ilutigitillugu aamma isumaqatigiippugut nunatsinni sumiiffinni assigiinngitsuni pitsaasorpassuarnik iliuuseqartoqartoq. Immaqalu uagut piviusorsiorluta tamakku isiginiarnissaat aallartittariaqapagut, Line Frederiksen oqarpoq.
Taamatullu oqarnera Naalakkersuisunut ilaasortap Maliina Abelsenip isumaanut naapertuuppoq, taassumaattaaq atortussat pioreersut meeqqanut inuusuttunullu kinguaassiutitigut atornerlunneqarsimasut katsorsaanermut atorniarpai. Meeqqat inuunnerissunut pingaarnerpaaq tassaavoq tamakku pitsaanerulernissaat.
- Uagut isumaqarpugut nutaamik Isumaginninnermut Naalakkersuisoqalersimanera assut nuannersuusoq, taannami siunissamut takorluukkanik uagutsitulli takorluugaqarpoq. Isumasioqatigiinnermi misigisaq nuannersoq tassaavoq, suliamik ilisimasallit sinerissamit tamaneersut katersuutsinneqarnerat, taakkulu tamarmik isumaqatigiissutigaat uagut iliuuseqaannarnata, kisianni aamma iliuusigut pitsaanerusinnasut. Uagut siunissamut takorluugaq pigisarput aammalu Maliina Abelsenip nuna tamakkerlugu siunissamut takorluugaa naqissuseeqataaffigaarput, Line Frederiksen oqarpoq.
Peqatigiiffiup Meeqqat Inuunerissut aalajangiussimavaa, meeqqat aamma inuusuttut amerlasuut kinguassitimikkut atornerlunneqarsimasut katsorsaanermik pisariaqartitaminnik katsorsarneqarsinnaannginnerat, namminneq akuerisinnaanagu.
- Meeqqat amerlasoorpassuit katsorsaaneq pisariaqartitartik pineq ajorpaat. Isumasioqatigiinnermi tusarparput suliassat amerlasuut qatangiinnartartut, uppernarsaatissat amigaataanerat pissutaallutik eqqartuussisoqarsinnaasanngimmat, taamaalillutik meeqqat inuusuttullu katsorsarneqarlutik ingerlaqqittussaagaluit katsorsarneqanngitsoortarput, Line Frederiksen.