Qalasersuaq Danmarkimut qaninneruvoq

Kalaallit Nunaata avannaani umiarsuarmik angalanerup naammasseqqammersup Danmarki aamma Kalaallit Nunaat, Qalasersuup qanittuani imartamik piumasaqaaternissamik neriuteqalersippaat.

- Uagut ajunngitsumik siuariarpugu aamma isumalluarpugut, Christian Marcussen, naalagaaffiup ilisimatusarnermik aamma siunnersuinermik ingerlatsiviani GUESimeersoq, oqarpoq. Svenskit umiarsuaat sikusiut "Oden" atorlugu angalanermut, aammattaaq geologit Canadameersut peqataaffisaanni, pisortaasoq.

Siunissami angalaqqittoqasaaq, tassa Kalaallit Nunaata aamma Qalasersuup akornanni sumiiffik suli uuttortarneqarsimanngitsoq misissorneqassammat. Tamatuma kingorna ilisimatusarneq aallaavigalugu paasissutissat, Kalaallit Nunaata nunavittaata Qalasersuarmut ataneranut, tunngavilersuutissatut misissoqqissaarneqassapput, taamaattumillu naalagaaffeqatigiit imartaanut tamanna atasoq. Suliassaq naalagaaffeqatigiit 2014 tikitserlugu naammassisassaat.

Tamatuma kingorna nalilersuisuussapput FN-ip Kommission for Kontinentalsoklens Grænser (FN-ip Nunavittat sumut killeqarnerat pillugu ataatsimiititaliarsua, nuts.), ilumut ilisimatusarneq tunngavigalugu paasissutissat katersorneqarsimasut FN-ip Havretskonventioniata (FN-ip imartat pillugit aalajangersagaa, nuts.) taamatut piumasaqartoqaraangat inatsisit tunngavigalugit naammannersut. Naggataatigut nunat arlallit politikikkut isumaqatigiinniarneqassapput, nunat tassa Qalasersuup qanittuani imartamik piumasaqaateqartut, Qalasersuaq Kalaallit Nunaata sineriaaniit 380 sømilinik ungasissuseqarpoq.

Manna tikillugu Qalasersuup qanittuani immap naqqani uuliaqarnersoq suli misissorneqarsimanngilaq, tamanna nunat angisuut soorlu Canadap aamma Ruslandip pisinnaatitaaffeqarfigilissallugu aammattaaq utaqqimaarpaat.

Naalagaaffeqatigiit sumiiffik Savalimmiut avannaaniittoq pillugu piumasaqaatiminnut tunngatillugu uppernarsaasersuutinik tunniussaqareerput. Tamanna pivoq maajip aallaqqaataani.