Pigissaartut umiarsuarsuat Nuuliarpoq
Umiarsuaq takornariartaat Deutschland 600-nik ilaasulik arfininngornermi Qaqortumut aqqusaartoq ataasinngorneq Nuummut tikissangatinneqarpoq.
Umiarsuaq aatsaat taama pigissaartigisoq Kalaallit Nunaata imartaani angalaalerunarpoq.
Das Traumschiff 2008-mik (2008-p umiarsuaa sinnattuinnarlusooq) nalilerneqarnera tupinnanngilaq, kanngussannik, qisunnik akisoorsuarnik qullernillu krystalinik qullilerluni pisatsersugaavoq sulisut saqisullu suna tamarmi qillertuinnaallunilu ajunnginnissaa isumagiuarpaat.
Hotelituulli akisoorsuartut umiarsuarmi ulloq unnuarlu saffiginnittarfik ammasarpoq nerisassat imigassallu ulloq unnuarlu sassaalliutigineqarsinnaallutik.
Hotelimi akisoorsuarmi puttasumi eqqumiitsuliat, qalipakkat soorlu Skagenip qalipaasorsuata Michael Ancher qalipagai ilusiliallu nunani tamalaaneersunit suliarineqarsimasut takussaapput.
Neriniartarfiit nersornaasigaanikut arlallit nerisassanik sassaalliisinnaapput soorlu imerniartarfiit imigassaateqarluartut arlallit isersimaarfigineqarsinnaasut.
Nerilluareersimagaanni imerluareersimagaanniluunniit umiarsuarmi nalunnguartarfiit silamiittut umiarsuulluunniit iluaniittut ikiffigeriaannaapput.
Umiarsuup qaarpiaani golfertoqarsinnaavoq, wellnesertarfimmi massage-tittoqarsinnaavoq. Unnukkut isiginnaartitsisarfimmi akiliikkusersuisoqartarpoq filmertoqarsinnaalluni salonimilu nipilersortunut qitittoqarsinnaalluni.
Inuit 60-it aliikkusersuisussatut atorfeqarput - angakkuartartoq, isiginnaartitsisartut, nipilersortartut, qitinnermik ilitsersuisartoq, filmertitsisoq meeqqanik aliikkusersuinissamik sulialik (meeqqat sisamat massakkut angalaaqataapput) soorunami nakorsaqarpoq, palaseqarluni angallassisartumillu atorfilittaqarput aamma.
Aningaasaateqarluartut umiarsuarmi pisinniarfilerinissaminnut aamma periarfissaqarput, pisiniarfimmi atisat nutaaliat pinnersaatit akisuut nalunaaqqutaaqqallu pisiassaapput.
Umiarsuaq nutaaliaagaluartoq pisatsersornera filmimi Titanicimi pisoorsuit inaata pisatsersorneranut tassanilu najugallit kiffartuunneqarnerannut atukkat assersuunneqarsinnaapput.
Kalaallit Nunaannut angalaneq ulluni 23-ni sivisussuseqartoq Hamburgimi aallartippoq. Angalaneq akikinneq 5.500 euronik akeqarpoq (40.000 kr. miss.) akisunerpaallu 24.000 euronik (180.000 kr. miss.) inummut ataatsimut akeqarput.