Nuummi nunanit allanit aviisit nutaaviit
Ataasinngorneq aggustip qulinganiit Nuummi innuttaasut aviisit nunanit assigiinngitsunit arfineq-pingasuneersut pissarsiarisinnaalissavaat. Aviisit assigiinngitsut 33-t nunanit makkunannga tikisinneqartalissapput USA, England, Tyskland, Island, Norge, Sverige, Finland aamma Danmark.
Tele Post nunanit allanit aviisit nutaaviit pissarsiarinissaat nutaatut suliniutigaa. Suliniut taaguserneqarpoq »Print on demand«.
Aviisit Nuummi allakkerivimmi qarasaasiatigut aniatinneqarsinnaapput nunarsuarmi aviisit aaqqissuisoqarfiinut qarasaasiakkut aqqut atorlugu, Tele Post paasissutissiivoq.
- Aviisit aniatinneqartassapput pappialamut 100 %-imik atoqqitamut pinngortitamillu allatigut pitsaaqqutilimmut. Aviisit atlantikoq aqqusaarlugu timmisartuunneqartassanngimmata timmisartukkut akia ileqqaarutaassaaq tamannalu CO2-mik atuinikinnerusitsissasoq, Brian Buus Pedersen oqarpoq.
Maannamut aviisit 33-t isumaqatigiissuteqarfigineqarput sullitattali ilaat nunanit allanit aviisimik perusuppat pissarsiarisinnaavarput, suliniummi aqutsisoq Salik Hard oqarpoq.
Suliniummi aviisit tallimat Finlandimeersuupput, Morgunbladid Islandimiit, norskit aviisii sisamat soorlu Aftenposten, svenskit aviisii arfineq-pingasut soorlu Ekspressen, tuluit arfinillit soorlu Daily Mirror, Die Welt Tysklandimiit amerikamiillu marluk Today aamma International Herald Tribune.
Danskit aviisii pisiniarfinni pisiarineqarsinnaapput. BT, Ekstra Bladet, Politiken aamma Jyllandsposten ataaseq 25 koruuninik akilik pisiniarfinni makkunani pisiarineqarsinnaapput Pisiffik, Brugsen, Butik Natalie, niuertarfiit Kamik kiisalu allakkerivimmi.