Skizofrenertut katsorsarniarnerannut hashi ajoqqutaasoq
Skizofrenimik nappaateqartut A1-imi katsorsartittut affai sinnerlugit hashimik atornerluisuusarput, tamanna katsorsarniarnerannut ajoqqutaasarpoq
A1-imi uninngasut hashimik eqqussisarput. Matoqqasumi ammasumilu tarnimikkut napparsimasut immikkoortortaqarfiani sulisut hashimik nassaartarput.
Hashimik atuisuuneq tarnikkullu nappaateqarneq inummut assut kingunipiloqarsinnaasarpoq. Dronning Ingridip Napparsimavissuani tarnimikkut napparsimasunut immikkoortortaqarfianni A1-imi skizofrenimik nappaateqarlutik katsorsartittut affai qaangerlugit hashimik atuisuusarput, taamatut Dronning Ingridip Napparsimavissuani tarnimikkut napparsimasunut immikkoortortaqarfimmi allaffissornermi nakorsaaneq taartaagallartoq Poul Nicolai Kleist ilisimatitsivoq.
– Tamanna napparsimavimmi uninnganerannut sivitsortitsisarpoq, tassami hashimik atornerluisuunermi nakorsaatit iluamik sunniuteqarsinnaanerannut ajoqqutaasarpoq, nakorsaaneq Poul Nicolai Kleist oqarpoq.
Skizofrenimik nappaateqartut hashimik atuisuugaangata katsorsarniarneri ajornarnerusarpoq ilaatigullu nakorsat suli katsorsartittoq iluamik aaqqilluanngitsoq napparsimavimmiit angerlartiinnartariaqartarpaat. Tarnimikkut napparsimasut ilai arlaleriarujussuarlutik napparsimavimmut unitsinneqarsinnaasarput, tamannalu hashimik atuisuunerannik0 peqquteqartarpoq.
– Allat napparsimavimmut unitsinneqartariaqarpata suli aaqqivinngitsut napparsimasut taakku angerlartiinnarneqartariaqartarput. Napparsimaveqarfimmi tarnimikkut napparsimasunut immikkoortortaqarfimmut ingerlateqqinneqartarput taamaaligaangallu ilaatigut takkutinngitsoorsinnaasarput, piffissarlu ingerlanerani ajorseriaqqittarlutik, napparsimaveqarfimmullu utikuluttorujussuanngorsinnaasarput, nakorsaaneq Poul Nicolai Kleist oqarpoq.