Sanigorsaatinik iisartagartoqqunngilaatigut
Iisarsakkat sanigorsaatit iluarineqarluartut Alli-t Kalaallit Nunaanni pineqarsinnaanngillat. Nakorsaallu Kalaallit Nunaannut eqquteqqusaanersoq nalornissutigineqarpoq.
Majimiilli iisartakkat sanigorsaatit Alli-t Danmarkimi nakorsaataarniarfinni pineqarsinnaalerput. Akeqanngitsumik. Iisartakkalli sanigorsaatit iluarineqarluartut tamakku Kalaallit Nunaanni inuit pualasuut suli pisinnaanngilaat, pisiaralugit nakorsamiilluunniit akuerineqarlutik pissarsiaralugit.
Alli-t Kalaallit Nunaanni pineqarsinnaalissappata assigiinngitsut arlallit paasiniarneqaqqaartariaqarput.
–Oqaluuserineqassaaq tamakku Kalaallit Nunaanni pineqarsinnaalissanersut. Pisiarineqarsinnaallutik imaluunniit allagartaqarluni pineqartassanersut, Nakorsaatinut Ataatsimiititaliap siulittaasua Birgitte Asmin Schurisek oqarpoq.
Iisartakkat Kalaallit Nunaanni Nakorsaatinut Ataatsimiititaliamit akuerineqaqqaartussaasaramik taakkulu iisartakkat sanigorsaatit septemberimi aatsaat naliliiffigisussaavaat. Nakorsat, peqqissaasut, nakorsaataasiviup pisortaa Nuummilu nakorsaataarniaq Nakorsaatinut Ataatsimiititaliami ilaasortaapput.
–Inuk nunami allami nakorsaammik Nakorsaatinut Ataatsimiititaliap akuerisimanngisaanik pisisimaguni taanna Kalaallit Nunaannut nassarsinnaavaa?
–Apeqqut taanna imaaliinnarlugu akineqarsinnaanngilaq. Peqqinnermut Naalakkersuisoqarfiup apeqqut inatsisilerituunut saqqummiutissavaa – augustip naanerani akineqarumaarputit, Peqqinnermut Naalakkersuisoqarfiup immikkoortortaqarfiani pisortaq Karna Jokumsen akivoq.
Sammisaq pillugu Sermitsiaq normu 32 atuaruk.