Nuna eqqissisimatitaq aggulunniarpaat

Nalagaaffeqatigiinni nuna eqqissimatitat annerpaartaat Nunatta tunuani avannamut kangianiittoq siunissami takornarianut takornariarfissatut kiisalu annertuumik aatsitassanik piiaaffittut aggulunneqarnissaa ilimanarpoq. Issittumi pinngortitamut mianernartumut uumasuinullu tamana sunniuteqassaaq.

Ilisimatuut ilaatigut umimmaat illersorniarpaat. Assiliisoq: Leiff Josefsen

Taamaattumik nuna eqqissisimatitaq en million kvadratkilometeringajannik isorartussusilik pingasunut assigiinngitsunut aggulunneqartariaqarpoq pinngortitaq avatangiisilu illersorneqassappata, taamatut siunnersuuteqarput Danmarks Miljøundersøgelser, DMU-mi, Danmarkimi avatangiisit pillugit misissuisarfimmi, ilisimatuut nalunaarusiami nutaami.

Nunap immikkoortui pingaarutillit aalajangersimasunik uumasoqarfiusut, soorlu umimmaqarfiit, immikkut akuersissuteqarluni aatsaat angalaarfiusinnaasut. Aamma nunap immikkoortui annerumaat 16-it biologit soqutigisaat qaqutigoortunik imaluunniit nungutaanissamut aarlerigineqartunik uumasoqarfiusut naasoqarfiusulluunniit aamma immikkuullarissumik pinngortitaqarfiusut immikkut pingaaruteqartunik immikkoortoqarfiusut aatsaallu pisortat tamatigut akuersinerisigut susoqarfiusinnaasut. Kiisalu nunap immikkoortua ataaseq nunap eqqissimatitaasup annertuup sinnera, maannakkut inuit susoqarfigisaat naammareersutut nalilerneqartoq.

Paasissutissat

DMU-p nalunaarusiaani inassutigineqarpoq tassani takornarianik pisuinnartunik sivikitsuinnarmik tassani takornariartartussanik angallassisartussat atugassaannik paasissutissanik suliaqartoqartariaqarnera.

Nunatta tunuani avannaarsuani nunami annertoqisumi inuit 35-t aalajangersimasumik najugaqartuupput, tassalu illersornissamut sakkutooqarfimmi Station Nordimi, nunamik alapernaarsuisartut Sirius Daneborgimi Mestersvigimilu najugaqartut, Summit-lejret Sermersuarmiittumi najugaqartut kiisalu ilisimatusarnermik suliallat misissuiffianni Zackenbergimi najugaqartut. Taakku saniatigut Ittoqqortoormiinit piniartut pingasut nunami eqqissisimatitami angalasinnaatitaapput.

DMUp nalunaarusiami allattorpai uumasut, nunamilu eqqissisimatitami uumasuunermikkut siammarsimanermikkut paasissutissanik amigartunik taamaallaat ilisimasaqarfigineqartut, ilaatigut amaroq, ukaleq, nerleq, uppik aamma appaliarsuk kiisalu arfivik aamma qilagaq qernertaq. Nunap eqqissisimatitap avannamut kitaata tungaa tamarmi annertunerusumik ilisimasaqarfigineqanngilaq.

/ritzau/

Powered by Labrador CMS