Borgmesteri aamma ambassadøri
Kingullerpaajussagunanngilaq USAp Danmarkimi ambassadørertaavata Kommuneqarfik Sermersuumi borgmesterimik naapitsinera.
– Ammaqaaq, qanilaartuulluni aamma arnaavoq ilumoortumik soqutiginnittoq, borgmester Asii Chemnitz Narupip, IA, Danmarkimi USAp ambassadørertaava pillugu taamatut oqarpoq.
Arnat taakku marluk naapipput ambassadørip siullermeersumik Nunatsinnut tikeraarneranut atatillugu. Nunatsinnukannginnermini ambassadørip kissaatigisimavaa kalaallinik arnanik pisortanik naapitsinissani. Tallimanngornermi siusinnerusukkut ambassadørip ilaatigut Katuami pisortaq Air Greenlandillu siulersuisuunerini siulittaasoq Julia Pars naapippaa kiisalu Siumup siulittaasua Aleqa Hammond.
Asii Chemnitz Narup naapertorlugu ambassadørip kissaatigaa Kalaallit Nunaata USAllu akornanni suleqatigiinnerulernissaq, soorlu ilinniartunik paarlaasseqatigiittarneq aamma aalajangersimasunik ilisimasallit eqqarsaatigalugit.
– Maanna immikkut tamakku eqqarsaatigissavagut. Uanga oqaluuserisagut eqqarsaatigeqqissaassavakka, maanga tikeraarnera inussiarnisaarnertuinnaq isigineqassanngippat, Asii Chemnitz Narup sermitsiaq.gl-imut oqarpoq.