Sisimiut TV: Akiliutisi unitsissigit
Sisimiut TV-anni ilaasortat 300-ngajaat septemberiutinnagu ataatsimeersuarnissamut aggersarneqassagunarput, taamatut oqarpoq siulittaasuugallartoq.
Sisimiut TV-anni Ilaasortat 300-ngajaat peqatigiiffimmut akiliutitik piaarnerpaamik unitsissavaat. Taamatut nalunaaruteqarpoq Sisimiut TV-ata nammineq pilerisaarinermut kanaliani.
Qaammat ataatsip matuma siornatigut TV-utileqatigiit dekoder-kanalia qamippoq, kisianni ilaasortanut paasissutissiinerit annikitsuinnaapput sooq akiliutiminnik pissarsiaqanngittarnerannut tunngatillugu. Sisimiut TV-atali nittartagaani ilaasortanngortut nutaat kajumissaarneqarput TV2Zulu pisiareqqullugu aamma arfininngornerit tamaasa TV-bingortarnermi peqataaqqullugit.
Siulersuisuini siulittaasuugallartup Peter Lennertip oqaatigerusunngilaa ilaasortat qanoq amerlatigisunik aningaasanik utertitsivigienqassanersut dekoderinut atorneqanngitsunut atatillugu. Nassuiaavoq ulluinnarni aqutsisut marlunngormat ataatsimiittut, aamma sisamanngornermi siulersuisut ataatsimiissagunartut ilisimatitsissutigalugu.
– Aggusti naatinnagu siulersuisut ullormik ataatsimeersuarfissamut aalajangiisariaqarput, ilaasortallu taava aalajangissavaat peqatigiiffimmi qanoq pisoqarnissaa. Ingerlaannassanersoq imaluunniit akiliisinnaajunnaassanersoq, oqarpoq.
Tamannali pitinnagu siulersuisut naatsorsuutit paatsiveqanngitsut tamakkiisumik paasisaqarfigisinnaasariaqarpaat, TV-eqarfiup pisortarigaluata Palle Lennertip naammassinagit qimatai.