Sisimiut TV-eqarfianni paatsiveerunneq
Pisortaq soraarpoq siulersuisullu tunuarniarlutik.
Sisimiut TV-ata matuani allassimasarpoq »Napparsimasoqarnera pissutigalugu matoqqavoq« imaluunniit »Allamik suliaqarneq pissutigalugu matoqqavoq«. Taamatut allagartaqarnermut TV-eqarfimmi paatsiveerunneq pissutaavoq, siulersuisut aamma tunuarratilernerannik kinguneqartoq.
Sisimiut TV’ata pisortaa, Palle Lennert, soraarnini tamanut saqqummiuppaa, inunnut nammineq atugarisani patsisigalugit tunuarnerarluni. Palle Lennert 2006-imili atorfinikkami naatsorsuutit naammaginanngitsumik ingerlanneqarsimasut aaqqinniarsimagaluarpai. Kisianni takussutissat pingaaruteqartut amigaataapput, Lennertillu iluatsissimanngilaa naatsorsuutit naammassinissaat.
Tamatuma kinguneranik siulersuisuni siulittaasoq Kristian Lyberth qanittukkut tunuarpoq. Kristian Lyberthip imaluunniit siulittaasuugallartup Peter Lennertip oqaaseqartinnissaat iluatsinngitsoorpoq. Sermitsiap paasisai naapertorlugit siulersuisuni ilaasortat tamarmik tunuarniarput, siornatigulli ilaasortaasimasut pingasut Sisimiut TV-ata aallarteqqinnissaa sulissutiginiaraat.
Maanna pisortatut tunuartoq Palle Lennert ilisimatitsivoq TV-eqarfimmi ukiorpassuarni atorfilik, Hans Ole Storch, maanna pisortaagallartoq. Hans Ole Storchip oqaaseqartinnissaa iluatsissimanngilaq.