Illoqarfimminni unammisut pissartanngorput
Nutartigaq: Angutit isikkamik arsaanneranni G-44 qularnaatsumik FC Malamukimut ajugaavoq.
Pissartanngorniutivinneq ingerlanneqarpoq arfininngornermi ualikkut. Tassani G-44-p unammisani 3-0-imik ajugaaffigaa, unillatsiarnermi 1-0-ioreerluni.
Muminnginnermi arsarnerup aallartilaarnerani malunnarpoq unammisut tamarmik pissangasut, kingornatigullu G-44 arsarluarnerulerpoq, isertitsinissamut periarfissaqartarluni toqqaannarnerusumillu arsariaaseqarluni, Kalaallit Nunaanni Arsartartut Kattuffiat, GBU, taamatut ilisimatitsivoq.
Arsarluarnerunerat muminnginnermi 1-0-imik siuarnerannik kinguneqarpoq, Malamuup målmandiata Zakorat Zeebip isertitseriaraluarneranik annaasseriarluni qatanngutaata Hans-Jørgen Zeebip isertippaa målip qisuttaata aappaa eqqungajallugu.
Mumereernermi FC Malamuk arsarluarneruleraluarpoq, soorlulu naligiilernissaat ilimanarsigaluarluni. Kisianni arsarnerup immikkoortuata appaa qiteqquttorlu arsartarfiup qeqqaniit Zakorat Zeeb kisimiilluni arsaq ingerlatilerpaa isertillugulu 2-0-imut. Unamminerup naammassinissaa 10 minutsiinnanngortoq Zakorat Zeeb isertitseqqippoq unamminerup inerneranut 3-0-imut.
Unamminerni ajugaanerit sisamat ataaserlu naligiinneq isertitsinerillu 15-3 tunngavigalugit oqaatigineqartariaqarpoq Nunatsinni pissartanngornerat pissusissamisoorluartoq qulakkeerneqarporlu illoqarfimmi innuttaasunit tapersersersorneqarluarlutik, arsartartut kattuffianiit taamatut naliliisoqarpoq.
Tasiusaq Bronzennappoq
Nunaqarfimmit Tasiusameersoq E-54 tupaallaatigineqartumik bronzennappoq Sisimiuneersoq SAK ajugaaffigimmagu.
Kujataarmiut ajugaapput strafferluni isertitsisaqattaareernermi. Nalinginnaasumik unamminerat 3-3-mik inerneqarpoq, kisianni straffeqattaareernermi unamminerup inernera 5-4-lluni, straffeqattaarnermi 2-1-imik ajugaareerluni.
SAK unamminerup ingerlanerani sivisuumik arsarluaraluarpoq 3-1-imillu siuaqqalluni nalinginnaasumik arsarnerup taamaatinnissaanut minutsit 30-innanngortullu. Kingornatigut E-54 arsarluarnerulerpoq, arsarnerullu immikkoortuata aappaa qiteqquttorlu isertitsilluni minutsilu kingullerpaaq atorlugu isertitseqqikkami naligiilerput.
Kingornatigut 2 x 15 minutsinik unammeqqikkamik arlaannaalluunniit isertitsinngilaq, taamaattumik E-54-ip strafferluni isertitsiniaqqaartarnermi ajugaalluni.