Nuuk pitsaaneruvoq
?Dansk Institut for Militære Studier-ip siunnersuutigaa ataatsimut annaassiniartarfeqalissasoq
?Kangilinnguani Sakkutooqarfiup qullersaqarfia Kangilinnguaniit Nuummut nuunneqartariaqarpoq.
Taamatut siunnersuuteqarput ilisimatuut marluk Henrik Jedig Jørgensen aamma Jon Rahbek-Clemmensen, Dansk Institut for Militære Studier-imeersut, nalunaarusiami »Hold hovedet koldt«, (Isumatusaaritsi), taannalu 2030-p tungaanut sakkutuut Kalaallit Nunaanni suliassaannik misissuineruvoq.
Ilisimatuut taakkua marluk isumaqarput Nuummut inissiinikkut sakkutuut suliassaat pitsaanerusumik akikinnerusumillu ingerlanneqarsinnaasut.
Pitsaanerusoq
Pitsaaneruvoq, pissutigalugu Nuummut nuussinikkut ataatsimut annaassiniartarfimmik pilersitsisoqarsinnaammat.
Ullumikkut imaani suliassat tamakkua Kangilinnguani Sakkutooqarfiup politiillu isumagisarpaat, ataatsimulli annaassiniartarfeqalerneq aaqqiissutaassaaq pitsaanerusoq.
Ukiuni makkunani umiarsuit takornariartaatit Kalaallit Nunaannukartartut amerliartorput, kikkullu tamarmik annilaanngatigaat umiarsuup tusintinik arlalinnik ilaasullip sulisullillu umiiarnissaa.
Tamatumuunakkut ataatsimut annaassiniartarfimmik aaqqissuussaasumik sulisartussamik pilersitsinissaq pisariaqartinneqarpoq.
Akikinnerusoq
Akikinneruvoq, pissutigalugu Forsvarskommandop naatsorsuinerata takutimmagu qullersaqarfiup Nuummut nuunneqarneratigut ukiumut 24,2 millioner koruunit sipaarutigineqartassasut.
Kisitsisinilli taakkunannga nuussinermut atatillugu ataasiarluni aningaasartuutit 195 millioner koruunit ilanngaatigineqassapput.
Allatut oqaatigalugu: Nuummut nuussinikkut aningaasartuutit ukiut 8,4 ingerlaneranni utertinneqarsimassapput.