Nunarput NORA-mi siulittaasunngorpoq
Atlantikup Avannaani Suleqatigiinnermut siulittaasoq ukiumi aggersumi ateqarpoq Jørn Hansen. Ingeniøri 57-inik ukiulik ukiorpassuarni nunatsinni inuussutissarsiutinik siuarsaaqataasimavoq.
Jørn Hansenip qaammammi kingullermi ukiumoortumik ataatsimiinnermi siulittaasuuffik tiguvaa, tassani savalimmiormiut NORA-p suleqatigissitaliaani ilaasortaatitaat Jákup Mørkøre ukioq ataaseq siulittaasooreerluni tunuarluni.
Jørn Hansen 1951-imi Danmarkimi inunngorsimavoq. 1975-imi Aalborg Ingeniørakademi-mit akademiingeniøritut ilinniagaqarnini naammassivaa, taamaasillunilu ilaqutariinni siulliulluni atuagarsornermik ilinniagaqartuulluni.
Ukioq taanna Kalaallit Nunaannut nuuppoq, piffissani sivisunerusuni nunatsinniittarluni, ilaatigut Nuummi Narsamilu. Ullumikkut Jørn Hansen Sisimiuni najugaqarpoq, RAMBØLL-imi allaffimmi pisortaalluni.
Jørn Hansen ukiorpassuarni Nuummi Sisimiunilu inuussutissarsiortuni akuleruttarsimavoq, maannalu Sisimiuni Inuussutissarsiornermut Siunnersuisoqatigiiinni siulittaasuulluni. Tatigineqartutut suliaasa aamma ilagaat Kalaallit Nunaanni Nutaaliorfimmi siulersuisunut ilaasortaaneq - ARTEK-imilu, nunatsinni ingeniøritut ilinniagaqarfimmik isumaginnittumi, malinnaasutut gruppimi ilaasortaaneq.
Tamatuma sanitigut Kalaallit Nunaanni nukissanut avatangiisinullu tunngasut pitsanngorsarniarlugit, allaffissornerup aaqqissuuteqqinneranik ajornaallisaraneranillu, angallannermut tunngasunut ilinniagaqartitsinermullu pisortat programmiisa arlallit ingerlanneqarnerat Jørn Hansenip peqataaffigisimavai.