Angallannermi periutsit nutaat
Umiarsuit nunatta imartaani isumannaatsumik angalanissaannut peqqussutit nutaat juulip1-ianni atuutilerput, imaraalu umiarsuarni ilaasut isumannaatsumik angalasinnaanissaannut pitsannguinerit.
Nalunaarummi umiarsuit assartuutit (tassalu umiarsuit 150 bruttotons qaangerlugit oqimaassusillit) aamma angallatit ilaasartaatit 12-it sinnerlugit ilaasoqarsinnaasut pineqarput. Angallatit taamaattut – kalaallinit nunanilluunniit allaneersunit pigineqaraluarunik – 3 sømilimut killeqarfiup iluanut pinerminni erngerlutik sillimanissamut maleruagassat sakkortusisat taakku malittussaavaat.
Kalaallit Nunaata imartaanik ilisimanninnerup qitiusumik pitsanngortinneqarnissaa Naalakkersuisut kissaatigaat.
Taamaattumik umiarsuaatileqatigiiffiit siunissami umiarsuup aquttuata imartamik naammattumik ilisimasaqarnera uppernarsartartussanngorpaat.
Tamatuma saniatigut imartani ikkarluppassualinni, kiisalu imartani uuttortarneqarsimanngitsuni aatsaat sillimanissamut maleruagassat arlallit malillugit iliuuseqartoqartillugu angalasoqarsinnaalissaaq, soorlu sikusiornermi siumoortaatinik atuinissaq ilaalluni.
Umiatsianik annanniutinik ammasunik atuneq atorunnaassaaq, piumasaqaatilli taassuma naammassineqarnissaanut umiarsuaatileqatigiiffiit naapertuuttumik piffissaqartinniarlugit aalajangersakkat tamatumunnga tunngasortai aatsaat 31. december 2010-mi atulersinneqassapput.
Søfartsstyrelsi Attaveqarnermut Aqutsisoqarfik suleqatigalugu Kalaallit Nunaanni imarsiornerup isumannaatsuunissaa eqqarsaatigalugu malittarisassanik suliaqarpoq.