Inissiat illullu PCB-qassusiat misissorneqassaaq
Nuummi Blok Q-p apriilimi isaterneqartup PCB-qassusianik misissuineq siulluvoq, nunatsinni inissiani qanoq PCB-eqartigineranik misissuinissani arlaqartussani.
Nuummi Blok R-ip S-illu sinnikui PCB-rtallit 1000 kubikmeterisut annertussusillit Nuup qanittuani iginneqarnikut qaqeqqillugit allamut inissinneqassapput.
Nunami namminermi pissutsinut naalakkersuisoqarfimmi immikkoortortami pisortaq Tina Kreutzmann Petersen oqarpoq, Blok Q pillugu nalunarusiaq, isatikkanit igitassat qanoq passunneqarnissaannik sammisaqarfiusoq, misissuinnernik allanik malitseqassasoq.
Knr.gl taama allappoq.
Tassalu illup iluini silaannaap qanoq inneranik, nunap mingutsinneqarsimaneranik, PCB-mik piiaasut qanoq atugaqartinneqarnissaannik aammalu illut isatikkat PCB-rtaqarpata taakkua qanoq pineqarnissaannik misissuisoqassaaq.
Suliassaq angeqaaq. Illut nalunaarsorneqarneri tunngavigalugit naatsorsuutigineqarpoq, nunatsinni inissiat illullu allat 5000-it missaat 1965-ip 1975-illu akornanni sananeqarsimasut PCB-mik akoqassasut. Sanaartornermi atortuni assigiinngitsuni, soorlu qalipaatini, qarmasissiani igalanullu oqorsaatini PCB taamani atorneqartarpoq, ilaaatigut qitullisaataalluni.