Ilulissani aasarimmi arpanneq
Inuit 140-t ukioq manna Cecilie-løbimi, arfiningormat Ilulissani ingerlanneqartumi 20-nik kiattoq arpaqataapput.
22,5 km-imut Oqaatsuniit Ilulissanut arpannermi ajugaasup Frederik Petersenip rekordi 2 minutsinik qaangerpaa, kiserrammi apuukkami 1 time 41 min 40 sek atorlugit.
Arnani Britt Folkermann ajugaavoq piffissami 2.24.33, taannalu pitsaanerit arfinileraat. Rekordi suli Marit Holmip 2005-imili pigaa 2.08.11-iusoq.
Kangerluarsummiit Ilulissanut arpannermi 14 km-imut rekordit tamarmik qaangerneqarput, angutini Frederik Mathiassen 1.05.12 arnanilu Else Hansen 1.31.51 atorlugit arpammata.
Arpattut nukarlersaat angajullersaallu Itisuarsummiit Ilulissanut 3 km-imut arpannermi peqataapput. Inuk Mathiassen 2-nik ukiulik apuuppoq 41.37 arpareerluni, arpattullu angajullersaat 69-inik ukiulik Agnethe Olsen (Anniitaaraq) minutsinik marlunnik kingulliulaarluni apuuppoq 43.34-ni ingerlaarsimalluni.