Danmarkimi ilinniagaqartut angerlarusupput
Kalaallit Danmarkimi ilinniagaqartut peqatigiiffiata Avalaap misissuinerata takutippaa kalaallit ilinniagaqartut amerlanerpaartaat ilinniagaqarnertik naammassigunikkut angerlarusuttut.
Avalak naapertorlugu tusagassiorfinnit pitsaanngitsumik isiginninneq, kingullermik DR-p 2007-imi piviusulersaarutaatigut "Kalaallit Nunaannit qimarranneq", isumaqartitsilersimagaluarpoq kalaallit ilinniagaqartut ilinniakkaminnik naammassinnikkunik angerlarusussanngitsut, Avalak nutaarsiassatut allakkiamini allappoq.
Avalaalli apersuilluni misissuinerata takutippaa tamanna eqqunngitsoq. Tassanimi takuneqarsinnaavoq 5 procentiinnaat nunatsinnut uterusunngitsut.
- Amerlanerpaartaat ilinniakkaminnik naammassinnikkunik angerlarusupput, pingajorarterutaalli ataallugit suli ilisimanngilaat angerlarusunnerlutik.
Avalaap apeqqarissaarutitigut immersugassatigut misissuinerani aamma ilinniagaqartut aningaasaqarniarnerat ilanngunneqarsimavoq, peqatigiiffiup siunissami sulinermini atorniagaanik.
Avalammi ilaasortanit 500-ungajannit 100-t missarpiaanniittut apeqqarissaarluni immersugassaq immersorsimavaat.