Piniarnermik Aalisarnermillu Ilinniarfik piareerluinnarpoq

Piniarnermik Aalisarnermillu Ilinniarfik Uummannamiittoq aggustip pingajuani atoqqaarfissiorneqarpat, ilinniarfiit nunatsinniittut nutaanersaat aallartissaaq.

Nunatsinni inuussutissarsiutit nutaannginnersaannik iliniarniffik aallartippat nunatsinni qulinik inuussutissarsiutinut ilinniarfeqalersimasaaq, knr.gl allappoq.

Ilinniarusuttut 30-t sinneqarsimapput, kisianni 15-it taamaallaat inissaqartinneqartut , ilinniarfiup ittua David Olsen oqarpoq.

- Atuarneq aaqqissuunneqarpoq, ukiup affaa atuarfimmeeriarlutik ukiup affaa sulinermik misiliisarlutik. Tassalu ilinniarneq ukiuni marlunni ingerlasartussaavoq, David Olsen oqarpoq.

David Olsenip saniatigut Piniarnermik Aalisarnermillu Ilinniarfik aalajangersimasunik marlunnik ilinniartitsisoqassaaq, aappaa atuagarsornermik aappaalu assassornermik piniarnermillu ilinniartitsisoq.

- Piniarnermik aalisarnermillu inuussutissarsiuteqarnermi imminut akilersinnaanerusumik ingerlalernissamik siunertaqarluni ilinniartitsinissaq siunniussimavarput. Assersuutigalugu aningaasanik aqutsineq ilinniassavaat, tassanilu Niuernermik Ilinniarfik suleqatigaarput, ilinniarfiup ittua oqarpoq.

Aamma piniartutut inuussutissarsiornermi malittarisassat, piniakkat eqqissisimatitaasarnerannut tunngasut piniariaatsillu ilinniarneqartassapput.

Ukiup affaani ilinniarfimmeereernerup kingorna ilinniartut misiliummik sulissapput, aggustillu pingajuani ilinnialertussat tamarmik sungiusaammik suliffissarsereersimasut, David Olsen oqarpoq.

- Aalisartutut piniartutullu inuussutissarsiummik ingerlataqareersut sungiusarfigineqassapput. Sungiusaammik suliffigisassaat isumannaallisaaanermut atortunik ullumikkumut naleqquttunik peqarnissaannik piumasaqarfiginerisa saniatigut allanik annerusumik piumasaqaateqarfigineqanngillat, David Olsen oqarpoq.

Piniartutut aalisartutullu ilinnialernissamut qinnuteqarniaraanni meeqqat atuarfianni atuarsimanissaq taamallaat piumasaqaatavoq. Ilinniartut tullii 2010-mi januaarimi aallartissapput.

Powered by Labrador CMS