600-t Danmarkimi iliniarlutik qinnuteqarput

Siornamut sanilliullugu 100-t sinnerlugit amerlanerusut Danmarkimi ilinniarniarlutik qinnuteqarsimapput.

Gymnasiareernerup kingorna Danmarkimi ilinniaqqerusuttartut amerliartorput. Aajuku Kujataata Ilinniarnertuunngorniarfiani ilinniarnertuunngorlaat. Assiliisoq: Poul Hard

Kalaallit inuusuttut 600-ngajaat piareersimapput aasaanerani feeriareernerup kingorna kujasinnerusumukarlutik Danmarkimi ilinniaqqinnissaminnut.

Danmarkimi Kalaallit Illutaannit sisamanit naatsorsuinerit naapertorlugit massakkuugallartoq 570-it aasaanerani feeriareernerup kingorna ilinniaqqinniarlutik qinnuteqarsimapput. Siorna kisitsit 466-iuvoq.

Taamatut ag.gl allaaserisaqarpoq.

Kisitsilli eqqortoq suli ilisimaneqanngilaq, aamma tamavimmik ilinniaqqinnissaminnut akuerineqarnissaat qularnarpoq.

Tamatumunnga apeqqutaapput agguaqatigiissillugu karakterimikkut angusaat aamma ilinniarfinnut assigiinngitsunut qanoq amerlatigisut qinnuteqarsimanersut. Illuatungaatigulli naqissuserneqarpoq Danmarkimi ilinniarnissamut soqutiginninnerup aatsaat taama annertutiginera.

København soqutigineqarnerpaavoq tassunga qinnuteqartut 180-iummata. Odense tulliuvoq 160-inik qinnuteqartoqarluni. Århus tulliuvoq tassunga 159-it qinnuteqarmata kiisalu Aalborgimut 71-it qinnuteqarlutik.

Naatsuinermi gymnasiami ilinniarnissamiit medicin- aamma inginiøritut ilinniartitaanerit qinnuteqarfigineqartut ilagaat.

Ukioq mannali kajungerineqarnerpaaq tassaavoq inuussutissarsiutigalugu pilotinngorniarneq aamma helikopterimut pilotinngorniarneq. Ilinniartitaaneq inuusuttut 17-it qinnuteqarfigisaat. Kisianni tamarmik akuerineqarsinnaanngillat, marluinnaammi kisimik toqqarneqassammata, tassunga ilinniartitaanermut Namminersorlutik Oqartussat killiliisimammata.

Taamatuttaaq alkologitut ilinniarnermut, tassani qinnuteqartut arfineq marluk inissat sisamat pilerngutissavaat.

Allat nuannarineqartut ilinniartitaanerit tassaapput psykologitut, nakorsatut, illussanik konstruktørinngorniarneq aamma issittumi inginiørinngorniarneq.

Powered by Labrador CMS