Sapigaqalernissamut qaninnerulerneq annertusiartupiloorpoq
Misissuinerup nutaap paasinarsisippaa kalaallit amerliartuinnartut sapigaqalernissamut akiuussutissaqalersartut amerliartortut. Niviarsissani inuusuttuni amerliartorneq malunnarneruvoq.
Inuup aavani sapigaqalernissamut akiuussutissaq, atopi, Kalaallit Nunaanni annertusiartuinnarpoq. Nakorsat Vibe Kamperip aamma Anders Kochip Statens Serum Instituttimeersut misissuinerisa tamanna paasinarsisippaat.
Taakku marluullutik siorna Sisimiuni meeqqat inuusuttuaqqallu 9-15-inut ukiullit qanoq amerlatigisut aaminni atopimik akoqarnersut misissorpaat. Misissuinerup paasinarsisippaa maannakkut 30 procentit atopiskiusut.
Tamatuma inernerup paasinarsisippaa atopimik akullit aamma procentinik qulinik qaffaqqissimasoq, tassa 1998-imi procentinik 20-niit 30-nut, taamani aamma Sisimiuni inuusuttut atopimik akoqassusiat misissorneqarpoq. Qaffariaat niviarsiaqqani malunnarneruvoq, Anders Koch, peqqinnissaq pillugu Canadami Yellowknifemi peqataasoq, ilisimatitsivoq.
Inuup aava atopimik akoqaruni imaanngilaq tamanna malugineqarsinnaassasoq. Tassa imaappoq sapigaqartunngorneq erngerluni pilissanngilaq. Kisianni inuup aava atopimik akoqaruni taava sapigaqarnermik nappaateqalernissaq inummut qaninnerulersarpoq, atopimik akoqanngitsumik aalimmut sanilliullugu.
Soorlu 1998-imi taamaattoq misissuinerup matuma aamma paasinarsisinngilaa, sooq taamatut qaffariarneq pinerspq kiisalu sooq qaffariarneq niviarsiaqqani malunnarnerunersoq. Kisianni nassuiaatit ilagisinnaavaat Kalaallit Nunaanni amerliartuinartut kitaamiut inooriaasiannik atuigaluttuinnarnerat.
Inernerup tamatuma pisariaqalersippaa siunissami Kalaallit Nunaanni sapigaqarnermik nappaateqarnerup eqqumaffigineqarnerulernissaa, kiisalu ilisimatusarnikkut misissuisoqartariaqarpoq qaffariaatip sooq pinera paasiniarlugu, taamaaliornikkut neriuutigineqarsinnaavoq Kalaallit Nunaanni atopimik qaffariartortoqarnerata unitsisinnaanera.