Ilisimatusartoq: Tingulluummut hepatitisimut akiuussutissiineq
Kalaallit Nunaanni meeqqat tallirarterutaaat tingulluummut tunillaassortartumut hepatitis B-mut ataasinnguamilluunniit akiuussutissamik pisimanngilaq, meeqqallu taamaallaat pingajorarterutaat akijuussutissanik pisariaqartunik akiuussutissalerneqarsimapput.
Tamakku ph.d.-ingorniarluni ilisimatusarnermik ingerlatsisup Malene Landbo Børresenip, Statens Serum Instituttimeersup misissuisimerani takuneqarsinnaapput issittumi peqqinneq pillugu isumasioqatigiinnermi Yellowknifemi ingerlanneqartumi saqqummiunneqarpoq.
Arnat naartunerminni misissortinnerminni hepatitis B-mik tunillatsissimallutik paasineqartut meerartaavi misissorsimavai.
Meeqqat arnaat tunillaassortartumik tingulluuteqarsimappata, taava meeqqat inunngornerminni akiuussutissamik tunineqassapput, kiisalu ataatsimik ukioqalinnginnerminni aamma suli pingasoriarlutik. Kisianni misissuinermi paasineqarpoq tamanna tamatigut eqquutsinneqatanngitsoq.
Misissuinermimi paasineqarpoq meeqqat tallimararterutaat ataasiarlutilluunniit hepetitis B-mut inunngornermik kingorna akiuussutissalerneqartarsimanngitsut, kiisalu taamaallaat meeqqat pingajorarterutaat akiuussutissanik sisamaasunik tamanik tunineqartarsimasut.
Akiuussutissat nappaat nungutissinnaagaluarpaat, naappaammi piffisami sivisunerusumi tingummi ajoquteqalersitsisinnaavoq imaluunniit tingukkut kræfteqalersitsisinnaalluni.
- Nunani issittuni Alaskami aamma Canadami ukiuni amerlasuuni hepatitis B-mut akiuussutissaliisarneq meeqqanik akiuussutissalersuisarnermut pilersaarutinut ilaatinneqarsimavoq, tamannalu pissutaalluni nunani taakkunani meeqqat akornanni tunillatsittarneq nungungajavissimavoq, Malene L. Børresen oqarpoq.
Arnaq taanna isumaqarpoq Kalaallit Nunaanni meeqqanik tamanik hepatitis B-mut akiuussutissaliisarneq aallartinneqartariaqartoq.
- Meeqqanut tamanut hepatitis B-mut akiuussutissaliisarneq atorneqaleraluarpat taava qularnanngilaq meeqqat akornanni tunillaasarnerup atuukkunnaarnissaa, tamaalillunilu nappaat qitiutinneqalissagaluarpoq, taamaalillutik meeqqat tunillatsissimasunik angajoqqaallit eqqaamaneqarnerussagaluarput.
Kalaallit Nunaanni tingulluut tunillaassuuttartoq takussaasorujussuuvoq kiisalu innuttaasut 8 procentiisa missaat anigorsinnaanngisaminnik tunillatsissimapput. Nappaat aak aamma anisooq aqqutigalugu tunillaattarpoq.
Amerlasuut ilisimasanngilaat anigorsinnaanngisaminnik tunillatsisimanertik taamma nappaateqarnerlutik malugisanngilaat, kisianni allanik tunillaasinnaapput kiisalu ukiut arlalippassuit tunillatsissimasimagaanni tamanna tingummi ajoquteqalernermik imaluunniit tingukkut kræfteqalernermik kinguneqarsinnaavoq.