Inneq illernartoq Nunatsinnut
Kangerlussuarmi ulluni pingasuni nalliuttorsiorpaluttumik pissusilersornikkut malunnartinniarneqassaaq silap pissusiata allanngoriartornerata anersaamut pingaaruteqassusia.
Nunat inoqqaavinit assigiinngitsunit, tamatumani ilanngullugit inuit, tarnikkut pisortat saapaatip akunnerata naanerani katersuutissapput Kangerlussuup kitaani 25 kilometerisut ungasissusilimmi, "Sacred Fire Ceremony"-mi, anersaarsiornermik pisumi, peqataassallutik, taannalu Kalaallit Nunaanneersumit Angaangaq Lyberthimit aqunneqarpoq.
Naapisimaaqatigiinnikkut siulittuut, tassa "silarsuaq ajornartorsiulerpat inneq illernartoq nunarsuup qaavanut utissaaq" naammassiniarneqassaaq, Angaangaq Lyberth tusagassiorsinnut nalunaarummi allappoq.
Arfininngornermi "the Ancient Voices Council" (utoqqaat nipaasa rådiat, aaqqiss.) naapissapput Anaanaq Nunarsuarmik siulittuutit oqaluttuallu agguaatissallugit kiisalu silap pissusiata allanngoriartorneranut tunngasut oqaloqatigiissutigissallugit.