Rubin Ilulissanut
Halibut Greenlandip umiarsuaa tunitsivik Upernaviup eqqaanit peeqquneqarsimavoq Ilulissiaqqullugu.
Halibut Greenland aalisarnermut naalakkersuisoqarfimmit erseqqissaavigineqarsimavoq umiarsuaq Upernaviup eqqaaniissanngitsoq, "Rubin"-ilu naamma Ilulissiarpoq. Taamatut oqarpoq selskabip pisortaa Daniel Skifte KNR-p radioavisianut.
- Tamanna aalisartunut uggornarpoq, Upernavik Seafoodili aalajangiisuusimagunarpoq, Daniel Skifte oqarpoq.
Upernavik Seafoodip tunitsivini arfinillit ammaqqeqqammerpai, sapaatip akunnerata ataatsip matuma siornatigut umiarsuarmut tunitsivimmut Rubinimut akerliulluni matusimasani.
Polar Seafoodimi siulersuisuni siulittaasoq Lars-Emil Johansen naapertorlugu Halibut Greenlandip manna tikillugu aalisarfigineqanngitsumiinnissaminik peqquneqarnini malissimanngilaa.
- Piumasaqaatit malinnagit angallat Upernavik Seafoodip pingaarnerusumik sammisaqarfianiippoq, tamannalu uagut soorunami isiginngitsuusaaginnarsinnaanngilarput, Lars-Emil Johansen oqarpoq.
Umiarsuup tunitsiviup akuersissutaa Daniel Skiftep allaanerusumik paasivaa.
Akuersissut malillugu umiarsuaq Upernavik Seafoodip tunitsiviinut qanillinngiinnassaaq.