TVmi igasartup Kalaallit Nunaat qilanaaraa

Igasup Chris Coubroughip siullerpaamik Nunatsinnut tikeraarnissani qilanaaraa, aallakaatitassiani tulleriaartuni taaguuteqartuni "A taste of Greenland" (Kalaallit Nunaani mamartut, nuts.) nunarput nittarsaatissagamiuk.

Chris Coubroughip nutaanik nerisassioriaasiliornissani saarulliit, tuttut, saattuat aamma raajat atorlugit qilanaaraa. Asseq: Limelight Management

Aggustip naalernerani igasoq Chris Coubrough aallakaatitassiarisartakkaminut nangeqattaarnut angalaneq/nerisassat atatillugu "A taste of Greenland" aallakaatitassiariartussagamikku.

TV-ikkut iganermik aallakaatitassiortartoq 37-nik ukiulik siornatigut Nunatsinniissimanngilaq, kisianni aallakaatitassiassamut ”A taste of Greenland”-imut atatillugu Chris Coubroughip paasiniarlugu misissorsimavaa nittarsaaffeqataaffigisassani nuna qanoq ittuunersoq.

– Kalaallit Nunaat nunatut assut takorannersutut takorloorpara, uangalu misiginissaa qilanaarivara, Chris Coubrough, sermitsiaq.gl-imut oqarpoq.

Nammineq New Zealandiminngaanneersuuvoq maannakkullu Tuluit Nunaanni najugaqarluni.

– Uanga isumaqarpunga New Zealand aamma Kalaallit Nunaat assigiissuseqartut, soorlu assersuutigalugu aamma uagut nunatta ilarujussuaq inuuffigineqanngilaq, Chris Coubrough oqarpoq.

Puisi aamma arfeq

TV-mi aallakaatitassiornermi igasartup naatsorsuutiginngilaa puisiminermik aamma arferminermik iganissani. Kisianni aallakaatitassiami aamma kalaallit puisinniartarnerat arfanniartarnerallu sammineqassaaq, ilisimatitsivoq.

– Neriuutigaarput kalaallit piniartut qanoq puisinik aamma arfernik pinnittarnerat pillugu, nunarsuarmiut sinnerinut ilisimatitsinermut ilapittuutaasinnaanissarput, Chris Coubrough oqarpoq.

– Uanga tamanna savanut maani Tuluit Nunaanni uumasuusunut assersuutikannerpara, taakkumi aamma inequnaqaat. Kisianni uagut taakku nerisarpagut, tamannalumi paasineqarsinnaavoq uagummi amerlasoorsuit pigaagut. Nunami sumiiffimmi pissarititaasut qujanartut inuussutigineqartariaqarput, ilaa, Chris Coubrough oqarpoq.

Aallakaatitassiaq siulleq Kujataani aggustimi sapaatit akunneri kingulliit marluk ingerlanerini immiunneqassaaq. Aallakaatitassiassat sinneri piffissami apriilimiit septembarimut 2010 immiunneqassapput.

Powered by Labrador CMS