Suliumajunnaarnissaq: Pakatsineq annertusiartorpoq
– Air Greenlandip ersarissumik nalunaarutigisariaqarpaa suliumajunnaarnissaq sioqqullugu nunatta avataanut billetsit nungussimasut, Maniitsormiu pakatsisimasoq oqarpoq, taassumalu Skotlandimut aasaanerani feriarnissani annaannguatsiarpaa.
Maniitsumiippoq Marie Sommer pakatsisimasorujussuulluni. Taanna ilaqutaalu sisamanngorpat juulip 23-ianni Danmarkimut aallartussaagaluarpoq, tassanngaanniillu sapaammi juulip 26-ianni Skotlandimut ingerlaqqittussaagaluarluni.
Marie Sommer Air Greenlandip saaffiginnittarfianut arlaleriaqaluni sianertarsimavoq, ilaquttanilu billetsissatik aallarnissamut siusinnerusumut allanngortinniarlugit. Tamatigulli pakatsisinneqartarsimalluni. Inersimasunut marlunnut meeqqanullu marlunnut billetsissaqanngilaq.
– Pakatsinartorujussuuvoq. Allaanngilarmi billetsinik pissarsinissamut neriuutissaqartoq Air Greenland oqarnikuummat saaffigissagivut. Billetseqanngilarli, Marie Sommer sermitsiaq.gl-imut oqarpoq.
Taanna isumaqarpoq Air Greenland ersarissuliuinnartariaqaraluartoq oqarlunilu billetseeruttoq.
– Ersarissumik nalunaarutiginsariaqaraluarpaat maanngaanniit Danmarkimut inissaqanngitsoq, taava sianeqattaartariaqanngikkaluarpugut, Marie Sommer oqarpoq.
Tamannali Air Greenlandip isumaqatiginngilaa.
Selskabip billetsit allanngortiterniarlugit ulapittorujussuuvoq, billetsillu ataasiakkaat suli pineqarsinnaapput, apeqqutaalluni sumunngarniarneq, tuniniaanermut ussassaarinermullu pisortaq Christian Keldsen oqarpoq.
– Qularnanngilaq suliumajunnaarnissap tungaanut ulluni avammut inissat killeqarmata, imaassinnaavorli inuit ilaasa sisamanngorpat aallartussaagaluit angalanissaminnik ullunik 14-nik kinguartitserusussinnaasut, Christian Keldsen Air Greenlandimeersoq oqarpoq.
– Angalasut pakatsimanerat paasisinnaaviuk?
– Paasisinnaalluarpara, atugaammi sussaanngillat. Aammattaarli apeqqutaalaarpoq inuit qassit aallassanersut. Qularnanngilaq angalasumut ataatsimut inissamik nassaarnissaq ilaqutariinnut sisamanik inuttalinnut nassaarnissamit ajornannginnerusoq, Christian Keldsen oqarpoq.
Marie Sommerip tunngavilersuut isumaqatiginngilaa. Taanna oqarpoq ilaqutariit marlunngorlutik avinnissartik neqeroorutigisimagaat, aammalu neqeroorutigisimallugu namminneq Nuummut imaluunniit Kangerlussuarmut angalanissartik isumagisinnaallugu, tamanna iluaqutaasinnaappat. Taamaassimagunanngilarli.
Skotlandimut aallanngitsoorunik angalanermut najugaqarnissamullu 30.000 koruunit missaanniittut annaasussanngorpaat. Suliumajunnaarneq "pissutsinut aqunneqarsinnaanngitsunut" ilaavoq taamaattumillu Air Greenland ingerlaqqinnissamut aningaasartuutit matussutissinnissaannut pisussaaffeqanngilaq.