Kangerlussuarmi efterskoli

Atuartut Qasigiannguani efterskolernissamut utaqqisut maanna Kangerlussuarmi efterskoleriarsinnaassapput.

Inuusuttuaqqat Kangerlussuarmi efterskolernissamut periarfissinneqarput. Assiliisoq: Leiff Josefsen.

Ukioq manna 14. septembarimiit inuusuttuaqqat 80-it sapaatit akunnerini 40-ni Kangerlussuarmii efterskolersinnaalissapput timersorneq, isiginnaartitsineq, assassorfiit aamma nalinginnaasumik atuarfimmi fagit qitiutillugit.

Naatsorsuutgineqarpoq atuartut meeqqat atuarfianni atuarnertik naammassereersimassagaat aappaagulu aasakkut fagimi ataatsimi arlalinniluunniit naggataarutaasumik nalilersuinermut piareersimajumaarnissaat misilitsinnermi karakteerit pitsanngorsarniarlugit.

Naalakkersuisut aalajangerpaat atuartut Villads Villadsenip Efterskolianut pinissamut utaqqisut Nunatsinni efterskolernissaannut periarfissaqartinneqassasut. Qasigiannguani efterskolernissamut inuusuttuaqqat 150-it inissanut 80-inut qinnuteqarsimagaluarput. Allallu inuusuttuaqqat inuusuttunut meeqqat atuarfianniit ilinniarfinnut allanut qinnuteqarsimagaluartut itigartulli Kangerlussuarmi efterskolernissamut qinnuteqarsinnaassapput.

Kangerlussuarmi efterskoli Villads Villadsenip Efterskoliata immikkoortortaqarfiatut ingerlanneqassaaq.

– Taamatut aaqqiineq siulersuisuni akuerineqarsimavoq, atuarfiup siulersuisuini siulittaasoq, Nuka Kleemann oqarpoq. Allaffissornikkut ataatsimoorussisassallutik allatigullu pisariaqarfitsigut immaqa sulisut suleqatigiittarsinnaanissaat Nuka Kleemannip naatsorsuutigaa.

Ukioq manna atuarfiusumi efterskoliugallartut sisamat pillugit nalilersuilluartoqarnerani ilaatigut takutinneqarpoq Nunatsinni efterskoleqarnerani atugarissaannginnermik inooriaatsimik kingornussisarneq taamatut qaangerneqarsinnaasartoq inuusuttut aalajangersimasut akornanni.

Qinnuteqarnissamut immersugassaq uani aaneqarsinnaavoq: www.vve.gl

Powered by Labrador CMS