Allakkat annguttassapput
Timmisartornermi suliumajunnaarnerup allakkanik nassitsinermut kinguneqartitsissaaq, TELE-POSTip utaqqimaarpaa suliumajunnaarniarnermi qanoq pisoqarumaarnissaa sivisuumillu suliumajunnaartoqassagaluarpat Island aqqusaarlugu allakkat annguttarnissaat sulissutigiumallugu.
POST Greenlandip timmisartuussisarnermi suliumajunnaartoqarniarnera malinnaavigaa Air Greenlandilu tamatuminnga qanimut attaveqarfigisarlugu.
Taamatut ilisimatitsivoq allakkanik nassitsisarnermi pisortaq Lars Holm Hansen, POST Greenland,
- Timmisartuussisarnermi suliumajunnaarneq sivitsussagaluarpat allakkallu nassiussat Nunatsinni Danmarkimi uninngasut amerliartuinnalissagaluarpata allatut iliornissaq eqqarsaatigisinnaavarput. Soorlu Island aqqusaarlugu Air Icelandillu Reykjavikimiit Narsarsuarmut, Ilulissanut Nuummullu timmisartuussisarneratigut allakkat ingerlateqqinneqartarsinnaanissaat eqqarsaataasinnaavoq.
POST Greenland maanna Air Iceland suleqatigillualereerpaa Tunup Danmarkillu akornanni allakkanik timmisartuussisarnissamut atatillugu.