Inissaarutivippoq
Air Greenlandimi suliumajunnaartoqarnissaata tungaanut aallarnissamut periarfissaqanngilaq.
Sisamanngorneq sioqqullugu aallarnissamut billetsit tamarmik nungupput. Tamanna Air Greenlandip ataasinngornermi ualikkut ilisimatitsissutigaa.
Timmisartuutileqatigiit ilimagaat angalasussaagaluit 1.200-t suliumajunnaarnerup ulluani siullermi timmisartuunneqarsinnaassanngitsut. Taamatullu amerlatigisut tallimanngornermi aamma eqqorneqassapput.
Aasaanerani angalanermi sisamanngornermi tallimanngornermilu angalasartut amerlanerpaajusarput, tassa ulluni taakkunani Kangerlussuarmiit Københavnimut marloriarluni timmisartoqartarmat. Ulluni allani angalasussat eqqugaasussat amerlassusiisa 1000-it inorpaat. Kisianni suliassat assigiinngitsut ingerlanneqaannassapput.
– Napparsimasunik angallassinerit, ujaasinerit aamma peruluttunik angallassinerit ingerlanneqaannarnissaat illuatungeriit isumaqatigiissutigaat, Air Greenlandimi tuniniaanermut nittarsaassinermullu pisortaq Christian Keldsen oqarpoq
Suliumajunnaarnissaq timmisartuutileqatigiimmut 10 aamma 14 millionit sapaatit akunneranut aningaasartuutaanerussaaq, kiisalu suliumajunnaarneq kangiutereeriarpat taava aammattaaq immikkut sulisussanik pisariaqartitsisoqassalluni.