Arsummi qinerseqqinneq
Nunaqarfimmi aqutsisuni ilaasortaq ataaseq marlunngornermi Arsummi qinerneqassaaq.
Ole Larsen, Inuit Ataqatigiit, apriilip 28-ani 2009-mi qinersinermi nunaqarfimmi aqutsisunut qinerneqaraluartoq, nalilerneqarpoq qinigaasinnaanngitsutut. Tassunga atatillugu qinerseqqittoqarnissaa pisariaqalerpoq Inuit Ataqatigiinni sinniisussaqannginnera pissutigalugu, sermersooq.gl allappoq.
Ole Larsenip aamma Kristian Larsenip (Siumut) inissaq taanna makitsinikkut unammissutigaat, Ole Larsenimillu pissarsiarineqarmat Kristian Larsen sinniisussanngortoq.
Qinerseqqinnermi sisamat qinigassanngortipput. Niels Peter Mikaelsen aamma Jørgen Christensen, tamarmik Siumumeersut aamma Hanne Jakobsen kiisalu Marie K. Kleist Inuit Ataqatigiinneersut.
Nunaqarfiup aqutsisuini ilaasortat allat tassaapput Ejnar Jakobsen, Inuit Ataqatigiit aamma Lars Albrechtsen, Siumut.
Qinersineq pissaaq Kommuneqarfik Sermersuup Arsummi immikkoortortaqarfiani nal. 09.00-imiit 20.00-ip tungaanut.