Pualasuut pualasorinngillat
Kalaallit arnat angutillu akornanni pualavallaartut tallimarterutaat sinnerlugit imminnut naammaginartumik pualassuseqarlutik imaluunniit saluppallaartutut isigisarput.
30-mik imaluunniit tamanna sinnerlugu BMI-qartut, naak nalinginnaasumik 18,5-ip aamma 25-p akornanni tamanna inissisimasussaagaluartoq, taakku imminnut pualavallaartutut isigisanngillat. Tamannalu peqqinnissamut oqartussaasunut pualavallaarnermik akiuiniarnermi unammilligassat ilagilersinnaavaat, peqqik.gl-imi allaserineqarpoq.
– Nammineq timip qanoq inneranik isiginneriaatsip aamma piviusut malillugit timip qanoq ippiarneranik ataqatigiissitsisinnaanerup amigaatigineqarnera, suliniutinut inuiaqatigiinni pualavallaarnerup annikillisarneqarnissaani unamminartut ilagilersinnaavaat, ilisimatusarnermik ingerlatsisoq Anni Brit Sternhagen Nielsen, Yellowknifemi issittumi peqqinnissaq pillugu isumasioqatigiinermi kalaallit naminneq timiminnik isiginneriaasiat pillugu saqqummiussinermini oqarpoq.
Ilisimatusarnermi ingerlatsisup inassutigaa pinaveersaartitsiniarnermi ingerlatsinerni oqimaappallaartut imminnut qanoq isiginneriaasiat isiginiarneqassasoq. Tamatuma saniatigut Anni Brit Sternhagen Nielsen misissueqqinnissanik ujartuivoq, taamaaliornikkut qulaajarniarlugit oqimaappallaarnerup inunnut ataasiakkaanut ulluinnarni inuunermut kiisalu inooriaatsimut toqqarsimasamut qanoq sunniuteqarnersoq.
Saqqumiussamut timimik qanoq isiginninnermut tunngasumut tunuliaqutaapput Statens Institut for Folkesundhed, SDU-p, misissuinerit Kalaallit Nunaanni 2005-imit 2009-mut ingerlassimasai, ilaatigut nerisarisartakkanut aamma oqimaappallaarnernut tunngasut.
Oqimaappallaarneq sukkornermik nappaateqalernissamut aamma uummatip taqaatigut ajoquteqalernernut pissutaasinnaapput taamaattumillu inuiaqatigiinni oqimaappallaarnerup pinaveersaartinnissaa aamma annikillisarneqarnissaa pingaaruteqarpoq, peqqik.gl-imi allassaaserineqarpoq.