Suliumajunnaarnissaq nalornissutaavoq
Pingasunngornerup unnukkuani tamanut suli tusarliunneqanngilaq Air Greenland suliumajunnaarnermik eqqugaassanersoq. Pisortat Nuummi katersuutsinneqarput.
Pingasunngorneq unnukkut nalunaaqutaq 20.01 illuatungeriinnit timmisartorneq suliumajunnaarnermik eqqorneqassanersoq pillugu tusarliisoqanngilaq. Piffissaq taanna tassaagaluarpoq suliumajunnaarnerup aallartiffissaa, tamanna arfininngormat tamanut tusarliunneqarpoq.
Kisiaanni Air Greenland imaluunniit timisartuni saqisut peqatigiiffiat, ACU, oqaaseqartinniarlugit attaveqarfigineqarsinnaanngillat, kiisalu arlaannaalluunniit nittartakkaminni nutaarsiassaqartitsinngillat.
Nuummi tuniniaanermut aamma nittarsaassinermut pisortaq Christian Keldsen, Udo Glashoff (chief commercila officer) aamma attaveqarneq pillugu suleqataasoq Pia C. Bang, Nuummi Air Greenlandip qullersaqarfiani nalunaaqutaq 20 naapipput.
Kisianni arlaannaataluunniit Københavnimi isumaqatigiinniarnerit oqaaseqarfiginianngilaat qanorluunniit ingerlasimanersut oqaatiginiarnagu. Qanorluunniimmi inerneqarsimanersut.