Kulusuup 100-nngortorsiornissaa nalliussineqassaaq
Aggustimi ulluni pingasuni nalliuttorsiortoqassaaq nunaqarfik mittarfeqarneranik ilisimaneqarluartoq Kulusuk 100-nngortorsiulerpat.
Qaaqqusarpassuit nunaqarfiup nalliuttorsiutigineqarneranik peqataasussat ilagaat borgmester Asii Chemnitz Narup, Kommuneqarfik Sermersooq, nunap iluani pissutsinut Naalakkersuisoq, Anthon Frederiksen aamma inatsisartut siulittaasuat Josef Motzfeldt.
Taakku saniatigut Nunat avannarliit allattoqarfianni, Napami, Namminersortuni aamma Kommuneqarfik Sermersuumi atorfillit, taamatut Kommuneqarfik Sermersuumit tusagassiuutitigut nalunaaruteqartoqarpoq.
Nunaqarfik Kulusuk aallaqqaammut Qulusummik ateqaraluartoq 1909-mi tunngavilerneqarpoq. Maannakkut 320-nik inoqarpoq tamarmillu nalliuttorsiornissaq ulapputigaat.
-Nalliuttorsiornissamut atatillugu assigiinngitsorpassuarnik aaqqissuussisoqassaaq. Nunaqarfimmi aqutsisut pingaartippaat nalliuttorsiornerit meeqqanut sammitillugit aallartinneqassasut, nunaqarfimmi aqutsisut siulittaasuat, Pele Maratse oqarpoq nangillunilu:
– Qaqqap qaavani erfaloq amoreerutsigu meeqqat suliaannik saqqummersitsineq ammassavarput, tamatuma kingorna ataatsimut nereqatigiissaagut, erinarsornermik tusarnaartitsisoqassalluni, isiginnaartitsisoqassalluni, tivasoqassalluni aamma inussummik uleersineq.
AAMMA ATUARUK: 100 - KULUSUK - 10
Naalagiaqatigiittoqassaaq aamma eqqaaniaasoqassalluni. Ulluni pingasuni nalliuttorsiorneq naggaserneqassaaq katersortarfimmi qitimmik.
Pisortatigoortumik nalliuttorsiorneq pissaaq aggustip arfernaniit arfineq-pingajuat ilanngullugu.