Nuummut siumuinnaq billetsilerluni
Amerlaqisut ikerinnarmiilertarput: Aalajangersimasumik najugaqarani inuillu allattorsimaffiannut allatsissimanani pisortanit ikiorsiissutinik pisoqarsinnaanngilaq.
Naluttarfeqarluni, filminut takuteqqaakkanut filmertarfeqarluni illoqarfissuartullu qullilersorsimalluni Nuuk illoqarfeerarmiunit isorliunerusunillu kajungernartorujussuuvoq. Amerlaqisullu nunami illoqarfiit pingaarnersaannut nuuttarput.
Kommuneqarfik Sermersuumili borgmesteriugallartup Astrid Fleischer Rexip, Demokraatit, tamanna mianersoqqussutigaa:
– Ajoqut nooqataasarpoq, nuuttullu amerlansuut isumaginninnikkut nakkaattoorsinnaapput inuiaqatigiinnilu allersanngorlutik.
Pisortanit ikiorsiissutit pillugit Inatsisartut peqqussutaanni 2006-imeersumi Kalaallit Nunaanni inuit tamarmik isumaginninnikkut qulakkeerneqarput:
Inuit, imminnut ilaquttaminnillu pilersuisinnaanngitsut aningaasatigut ikiorserneqarnissaminnut pisinnaatitaaffeqarput.
Ikiorsissuteqassagaannili piumasaqaataavoq inuit tamakkua aalajangersimasumik najugaqassasut inuillu allattorsimaffiannut allatsissimassasut.
Piumasaqaatit taakkua marluk naammassisinnaanngikkaanni taava pisortat ikiorsiissutaannik pisoqarsinnaanngilaq.
Angerlarsimaffeqanngitsulli aalajangersimasumik najugaqanngillat ilarpassuilu inuit allattorsimaffiannut allatsissimanatik.
Taamaasilluni tamakkua maaniinnarmiipput, oqartussaasullu ajornartorsiut qanoq annertutiginersoq ilisimanngilaat.
Angerlarsimaffeqanngitsut pillugit atuarit Sermitsiaq nr. 30-mi.