Alaa
Uninnissamut minutsi kingulleq atorlugu illuatungeriit timmisartuni saqisut isumaqatigiissutissaat isumaqatigiissutigaat. Air Greenland sullittakkani sinnerlugit nuannaarpoq.
Sapaatit akunneranni kingullermi isumaqatigiissitsiniartartup illuatungeriit isumaqatigiissuteqartissinnaannginnamigit taamaatiinnarpai tamatumalu kingorna, suliumajunnaarnissaq pinngitsoortinneqassaappat taamaallaat periarfissatuaalerpoq, Air Greenlandip aamma timmisartuni saqisut kattuffiata ACU-p, naggataarpiamik isumaqatigiissuteqarniarnissaat.
Kiisalu taamaatinnissamut nal. 24 qallunaat nunaanni nalunaaqutaq malillugu (kalaallit nunaanni nalunaaqutaq malillugu 20) minutsi ataasiinnanngortorlugu illuatungeriit isumaqatigiissuteqarput, ACU-p siulittaasua Anders Mark Jensen, maskinbaldet.dk-mut ilisimatitsivoq.
Isumaqatigiissut maanna ilaasortat akornanni taasissutigineqartussanngorlugu nassiussuuneqarpoq, taassumalu inernera aggustip aqqangani piareersimassussaavoq.
Timmisartukkut aamma qulimiguulinnik angallannerup unitsinneqanissaa qanittuararsuanngoraluarluni pinngitsoortinneqarnera Air Greenlandimit uppernarsarneqarpoq.
– Tassa piffissaq kingullerpaaq atorlugu isumaqatigiissuteqarneq iluatsippoq, tuniniaanermut aamma nittarsaassinermut pisortaq Christian Keldsen sermitsiaq.gl-imut oqarpoq.
Pisortat sinneri peqatigalugit timmisartuussisarnerup qulakkeerallarneqarnerata iluatsinnera nuannaarutigaa.
– Uagut sullittakkatta aallarsinnaalernerat aamma angerlarsinaalernerat assorsuaq nuannaarutigaarput. Kiisalu oqiliallaatigaarput maannakkut piffissami aggersumi toqqissisimasoqarallarnissaa, Christian Keldsen oqarpoq.
– Ilissi maannakkut ilaasortat taasisinneqarnerata qanoq inerneqarnissaa naatsorsuutigaasiuk?
– Uanga tamanna oqaaseqarfigisinnaanngilara, Christian Keldsen oqarpoq, isumaqatigiissullu sunerpiaq imaqarnersoq aamma oqaaseqarfiginiarnagu.