Tissiartaat hashiutilik susimava
Kangilinnguani Sakkutooqarfiup tissiartaammik naapitsineq pillugu saqqummiussaqarpoq, tissiartaammi ikiaroornartoq hashi 118 kiilu nassaarineqarpoq.
Sinerissami nakkutilliissutip Ejnar Mikkelsenip tissiartaat siullermik juulip 10-ani atassuteqarfigaa. Ejnar Mikkelsen nalinginnaasumik nakkutilliitilluni tissiartaat pasinartumik pissusilersortoq maluginiarpaa.
– Ejnar Mikkelsenimit angallat atassuteqarfigineqarpoq imaatigut sikorsuaqaqisukkut ingerlaarnissamini ikiorsertariaqarnersoq tusarniaaffigalugu. Atassuteqarniarneq tissiartaammit nangaasunnguamik akissuteqarfigineqarpoq, Kangilinnguani Sakkutooqarfik allappoq.
Piffissami tamatumani angallat Nanortaliup kujataaniiippoq kiisalu issimasut marluusut nalunaarutigaat angallammi suna tamarmi ajunngitsoq, kisianni angallat umiarsuit nalunaartarfiannut GREENPOS-imut (Kangilinnguani Sakkutooqarfiup umiarsuarnik angalasunik nakkutilliissutaa) nalunaaruteqarsimanngilaq, tamatumunngalu ilutigitillugu tissiartaatip naalagaa tamaani angalanermik sungiussisimasoorpalunngilaq.
Tissiartaat GPS-eqarpoq, radareqarluni immallu assinginik peqarluni – kisianni silap qanoq issusianik sikorsuillu sumiissusiannik nalunaarsuisimanermik paasisaqarnissamut atortorissaaruteqarani. Immami tamaani sikorsuaqarnera angallatip nalagaanut tupaallatsitsisimavoq angallallu ulluni arlalinni sikorsuit akornanniissimalluni, taamatut allaaserisaqarpoq Kangilinnguani Sakkutooqarfik.
Ejnar Mikkelsenip angallammik naapitsisimanini Kangilinnguanut nalunaarutigaa alapernaarsuininilu nangillugu, kinguninnguali Aasiaat Radioanit kallerrinneqarpoq qanittukkut nalunaaruteqartoqarsimasoq tissiartaat motooriminik ajutoorsimasoq.
Ejnar Mikkelsen utermat maskiinalerisut marluk tissiartaammut ikaarunneqarput, taakkulu paasivaat gearkarsia uuliaarussimasoq taamaalilluni gearia aserorsimasoq.
Alapernaarsuut angivallaarpoq tissiartaammik 35 fodsimik angissusilimmik kalinnissamut, taamaattumik politiit angallataat Sisak III kalerrinneqarpoq.
– Kingornatigut politiit tissiartaammi misissuinermi, ilaatigut politiit qimmiat ikiaroornartunik ujarlertartoq peqatigalugu, aallaqqaammut hashimik annertuallaanngitsumik nassaarput. Qimmeq soqutiginnippallaaqimmat angallat politiinit nakkutigisassanngortinneqarpoq kingornatigullu sukumiisumik misissuiffigineqarluni, Kangilinnguani Sakkutooqarfik allaaserinnippoq.
Kingornatigut tissiartaat Nuummut kalinneqarpoq, maannalu politeeqarfiup tunuaniitinneqarpoq.