Iqalunnut aqqut nutaaq

Air Greenlandip ulluni makkunani Nunatsinniit Iqaluit tungaannut timmisartuussisoqartarsinnaanera misissuiffigaa.

– Suliniuterput pimooruttorujussuuarput Nunatsiaq Online naapertorlugu Christian Keldsen, Air Greenlandimi tuniniaanermik ussassaarinermillu pisortaq oqarpoq.

Timmisartuussisoqartalissagaluarpat Air Greenlandip naatsorsuutiginngilaa tapiiffigineqarnissartik, taamaattorli Kalaallit Nunaata Nunavullu akornanni timmisartuussisoqartalernissaa imminut akilersinnaanersoq misissuiffigalugu.

Christian Keldsen naapertorlugu Baltimoremut timmisartuussisaleraluarnermit misilittakkat paasitippaat, Amerikap avannaanut angalaniat ikippallaartut, taamaattumik nunap immikkoortortaani uani pilersitsiniartoqarpoq.

- Qaammatit arfinillit angullugit nunat tamalaat akornanni aqqummik pilersitsiniarneq pappialarsornertaqartoq, Christian Keldsen oqarpoq.

Air Greenlandip neriuutigaa akimut timmisartuussisalernissaq 2010-mi piviusunngortinneqarsinnaasoq.