USA Kalallit Nunaanni ilinniarfiusinnaasumik aallarniipput

Dartmouth universiteti USA-miittup Issittoq pillugu ilisimatusarnermik immikkoortortaa Kalaallit Nunaanni ilinniagassamik nutaamik aallartitsisut, KNR paasissutissiivoq.

Ilinniarneqarsinnaasoq I-Gertimik taaguuserneqartoq immikkoortortamik pisortaaq professor Ross Virginia, aqutsisorissavaa. Ilinniakkami ilinniarneqarsinnaapput pinngortitap pissusaanik ilisimatusaatit, ileqqussarititaasut politikkilu imminnut tapertariissillugit. Taamaasilluni universitetip avatangiisit pillugit ajornartorsiutit silallu allanngoriartornerata kingunerisaanik allanngoriartornerit misissoqqissaarsinnaalissavai.

Ilinniariaaseq aappaagu aallartivissaaq, professor Virginiali sapaatip akunnerata tulliani Kalaallit Nunaaliassaaq Nuummi Kangerlussuarmilu suliassat piareersariartorlugit.

Aappaagu aasakkut amerikamiut ph.d-mik ilinniartut arfineq-marluk siulliit Kalaallit Nunaaliassapput, naatsorsuutigineqarluni silap allanngoriartornera pillugu kalaallinik ilinniartunik allanik suleqateqarnissaat. Ilinniartut aamma ilinniassavaat qanoq isilluni ilisimatusaatit nunatsinni nunanilu tamalaani politikkikkut atorneqarsinnaanersut. Ilinniartut taamaasillutik sakkussarsisinneqassapput ilinniakkaminnik naammassinnikkunik qanoq isillutik nunatsinni nunanilu tamalaani sulisinnaanissamut.

Ilinniariaatsip I-Gertip aamma inuit qaangaanniilli ilisimasaat nunarsuup kitaani ilisimatusarnermut nutaaliaasumut qanoq ilanngunneqarsinnaanerinut sammitinneqassaaq, taamaasilluni silap allanngoriartorneranut pitsaanerpaamik paasinnittoqaqqullugu. Ilinniartut Kalaallit Nunaanni innuttaasunik ataatsimiititsisarumaarput, taamaalillutillu taakkua suliaat maani najugalinnut siammarterneqarlutillu oqaloqatigiissutigineqassallutik.

Ilinniariaat I-Gert USA-mi ilisimatusartut ataatsimiititaliaanit the National Science Foundationimit aningaasarpassuarnik tapiiffigineqarpoq.