Qaqqami kangerlummilu ajutoortut ikilipput
Nuummi ajutoortartut ikilinerannut pissutaavoq paasisitiniaanerit, Nuummi qaterisartut naalagat oqarpoq,
Ukiuni arlalinni Nuup eqqaani pinngortitami annertuumik ajutoortarnerit amerliartorsimapput. Qaqqani aamma kangerlummi ajutoornerit amerliartornerat assigiissimavoq ajutoornerillu arlallit toqumik kinguneqartarsimapput. Taamaattoqartarnerali maannakkut killormut saappoq. Angallatit ikkarlittut aamma motooriminnik aserortoortut aammattaaq qaqqani pisuttuartut ingerlaqqissinnaajunnaartut imalunniit ajutoorsimasut affaannanngorsimapput. 2007-ip ingerlanerani imaani annaassiniarnerit arfiniliusimapput qaqqanilu sisamaasimallutik, kisiannili taakku amerlassusiat siorna affaannanngorsimapput.
– Uagut innuttaasunut paasisitsiniaasarnerput kinguneqarsimassaaq, Kommuneqarfik Sermersuumi qatserisartut naalagaat Knud Petersen oqarpoq. Qaterisartut naalagaat aamma annaassiniartartunut pisortaavoq, ukiunilu kingullerni marlunni qatserisartut 34 annaassiniarnermut pikkorissartinneqarsimapput, tamatumunnga ilaallutik qaqqasiorneq, ikiueqqaarneq aamma imaani kiisalu qaqqami annaassiniarnerit.
Ukioq manna kommunip Quassussuup qaavanut, aasaanerani pisuttuarfigissallugu assut nuannarineqartup, aqqutaa sillimaniarneq pissutigalugu nalunaaqutsersorsimavaat. Ukiut siuliini pisuttuartarfik taannarpiaq inuit arlallit inuunerinik naleqarsimavoq.