Oqaasiinnakkut isumaqatigiissut qimarratigaa
Assammik arsartartup Aqqaluk Sørensenip Faaborg HK isumaqatigiissummik atsioqatigiiffigaa naak Odderilu oqaasiinnakkut isumaqatigiissuteqaraluarluni.
Ukioq assammik arsarfiusoq naalermat Odderimi assammik arsartartut peqatigiiffiat Aqqaluk Sørensen taassumalu timersortartutut agentia Peter K. Bertelsenip isumaqatigiipput, kalaaleq assammik arsartartoq ukioq assammik arsarfiusoq nutaaq aallartippat Odderimi arsaqataaqqittassasoq. Oqaasiinnakkut isumaqatigiittoqarpoq Aqqaluk Sørensenip Kalaallit Nunaannut angerlarallarnera pissutigalugu, aatsaat isumaqatigiissut atsiorneqassalluni Aqqaluk Sørensen Odderimut uterpat. Dagblandet Rinkøbing Skjern taama allappoq.
- Assorsuaq nuanniippoq. Qanorluunniit oqartoqassagaluarpat arlaa peqquserluffigineqarpoq. Takorluulaariartigu illuatungaanullu saatillugu, timersoqatigiiffik timersortartumut oqaasiinnakkut isumaqatigiissumminik eqquutsitsinngitsooraluarpat Spillerforening (timersortartut peqatigiiffiat) tuaviinnaq qanoq iliuuseqassaaq, Carlo de Silva håndboldklubben Odderimeersoq Dagblademut oqarpoq.
Aamma Aqqaluk Sørensenip timersortartutut agentiata Peter K. Bertelsenip, assammik arsartartoq qatsulluinnarnerarpaa Odderimik isumaqatigiissummik eqquutsitsinngimmat. Peter K. Bertelsen naapertorlugu Aqqaluk Sørensen Faaborg HK-mik attaveqalerpoq Fynimi assammik arsartartoq alla aqqutigalugu.
- Ileqqorissaarnerunngillaq. Odderi uangaluunniit paasiteqqaarnanga atsiorsimavoq. Soorunami oqaluuserineqarsinnaavoq kukkuneq sumiinnersoq. Aqqaluk Sørensen ileqqorissaarnerup tungaatigut kukkussuteqarpoq, Odderili pappialarsornerup tungaatigut kukkussuteqarluni, taakkumi isumaqatigiissuk piareeqqasimanngilaat, Peter K. Bertelsen oqarpoq.
Timersoqatigiiffiup Divisionsforeningi saaffigisimavaa akineqarnissaminnillu utaqqillutik.