Finlandimiut Kalaallit Nunaanni

M/S Kristina Regina takornariartaassuit Kalaallit Nunaannut tikittut anginersarinngilaat. Taamatuttaaq takornariartaassuit nutaajunersaralugulu akisunersarinngilaat. Takornariartaammilli ilaasut 200-t sulisullu 51-t Finlandimeersut soorlu angerlaannakasillartut.

- Umiarsuaq finnit nuannarisaat naapertorlugu sanaajuvoq, pingaartipparput ilaasutta angerlarsimasutut misigisimanissaat, aquttoq Mitto Partanen ilaqutariit umiarsuaatileqatigiiffiitaanni Kristina Cruisesimi piginneqataalluni ulluinnarni pisortaasoq oqaluttuarpoq. Taassuma qatanngutini ukuanilu umiarsuaatileqatigiiffimmi piginneqatigai.

M/S Kristina Reginap Finlandiminngaanneersuunerata uppernarsaatinut ilaavoq umiarsuarmi sisamanik saunaqarnera, ilaasunit sulisunillu atorneqarsinnaasunik.

- Finnit kulturiannut saunartarneq ilaalluinnarpoq, Mitto Partanen oqarpoq ilami Finlandimi millioninik marlunnik saunaqarpoq inunnut millioninut tallimanut atugassanut.

Umiarsuaq aasakkut nunani avannarpasissuni angalasarpoq, tikittarlugit Island, Skt. Petersborg Norgelu, ukiukkullu imaq Akullersuaq imarlu Aappalaartoq angalaarfigisarlugit.

Umiarsuaq takornariartaat 50-nik ukioqangajalersoq siusinnerusukkut Svalbard tikillugu angalasareerpoq aatsaalli Kalaallit Nunaat tikillugu.

Naak umiarsuaq M/S Kristina Regina sikusiorsinnaasuugaluaq imartamilu sikutalimmi angalasareeraluaq, Kalaallit Nunaata imartaani angalanera umanninartoqarpoq.

- Siku nalunngilarput nalunngisarpulli sikuuvoq nutaaq. Ilissi »pisoqqamik« sikoqarpusi, aquttoq Mitto Partanen oqarpoq, taamaammat sapaatip akunnerata siuliani Kujataanut pigamik ilisimasortamik ilaqalertariaqarsimapput.